കേരളത്തിലെ എയ്ഡഡ് സ്‌കൂളുകളുടെയും കോളേജുകളുടെയും ഉടമസ്ഥതയുടെ സമുദായം തിരിച്ചുള്ള കണക്കുകളെ പൊതുജന മധ്യത്തിലേക്ക് എത്തിക്കുന്നതാണ് ഈ പഠനം.
കേരളത്തിന്റെ വിദ്യഭ്യാസ-ഉന്നത വിദ്യാഭ്യാസ രംഗത്തെ നിര്‍ണായകമായ സാന്നിധ്യമാണ് എയ്ഡഡ് ഉടമസ്ഥതയിലുള്ള വിദ്യഭ്യാസ സ്ഥാപനങ്ങള്‍. സ്വകാര്യ ഉടമസ്ഥതയിലാണെങ്കിലും ഇത്തരം സ്ഥാപനങ്ങള്‍ക്ക് ഗ്രാന്റുകളും മറ്റ് ഫണ്ടുകള്‍ വഴിയും കൂടാതെ ശമ്പള-വകയിലുമുള്ള സാമ്പത്തികമായ സഹായങ്ങള്‍ നല്‍കുന്നതും സർക്കാറാണ്. കേരളത്തിലെ എയ്ഡഡ് സ്‌കൂളുകളുടെയും കോളേജുകളുടെയും ഉടമസ്ഥതയുടെ സമുദായം തിരിച്ചുള്ള കണക്കുകളെ പൊതുജന മധ്യത്തിലേക്ക് എത്തിക്കുന്നതാണ് ഈ പഠനം.
കേരളത്തിലാകെ 7140 എയ്ഡഡ് സ്‌കൂളുകളാണുള്ളത്. ഇതില്‍ 2957 എണ്ണം (41.4%) ഹിന്ദു സമുദായത്തിന്റെ ഉടമസ്ഥതയിലുള്ള സ്ഥാപനങ്ങളാണ്. ക്രിസ്ത്യന്‍ സമുദായത്തിന്റെ അധീനതയില്‍ 2596 സ്‌കൂളുകളുമാണുള്ളത്. ഇത് ആകെ എണ്ണത്തിന്റെ 36.4% വരും. അതേസമയം, 1384 സ്‌കൂളുകളാണ് മുസ്‌ലിം സമുദായത്തിന്റെ ഉടമസ്ഥതയിലുള്ളത്. ഇത്, ആകെ എണ്ണത്തിന്റെ 19.38 ശതമാനമാണ് വരുന്നത്. ബാക്കിയുള്ള 203 എണ്ണം (ഇത് 2.84% വരും) മറ്റുള്ളവരുടെ ഉടമസ്ഥതയില്‍ വരുന്നതാണ്. ഇതിനെ മേഖലകള്‍ തിരിച്ച് വിശകലനം ചെയ്യുകയാണെങ്കില്‍, മലബാര്‍ മേഖലയില്‍ ആകെ 3504 സ്‌കൂളുകളാണ് ഉള്ളത്. ഇത് ആകെ എണ്ണത്തിന്റെ 49.08% വരും. ഇതില്‍ 1866 എണ്ണം ഹിന്ദു സമുദായത്തിന്റെ ഉടമസ്ഥതയില്‍ വരുന്നതാണ്. ഇത് ആകെ എണ്ണത്തിന്റെ 26.13% വരും. മലബാര്‍ മേഖലയില്‍ 1174(16.44%) സ്‌കൂളുകളാണ് മുസ്‌ലിം ഉടമസ്ഥതയിലുള്ളത്. അതേസമയം, 387(5.42%) സ്‌കൂളുകളാണ് ക്രിസ്ത്യന്‍ സമുദായത്തിന്റെ ഉടമസ്ഥതയിലുള്ളത്. 77(1.08%) എണ്ണം സ്‌കൂളുകൾ മറ്റുള്ളവരുടെ ഉടമസ്ഥതയിലും വരുന്നുണ്ട്.
ഇതേ വിശകലനരീതിയില്‍ മധ്യ-തെക്കന്‍ കേരളത്തിലെ സ്‌കൂളുകളെ പരിശോധിക്കുകയാണെങ്കില്‍, 2209 സ്‌കൂളുകള്‍ ക്രിസ്ത്യന്‍ ഉടമസ്ഥതയിലാണെന്ന് കാണാം. ഇത് ആകെ എണ്ണത്തിന്റെ 31.84% വരുന്നുണ്ട്. ഇവിടെ, 1091 സ്‌കൂളുകളാണ് (15.28%) ഹിന്ദു സമുദായത്തിന്റെ ഉടമസ്ഥതയിലുള്ളത്. അതേസമയം, മുസ്‌ലിം സമുദായത്തിന്റെ ഉടമസ്ഥതയിലുള്ളത് 210 സ്‌കൂളുകളാണ്. ഇത് ആകെ എണ്ണത്തിന്റെ 2.94% ആണ് വരുന്നത്. മറ്റുള്ളവരുടെ ഉടമസ്ഥതയില്‍ 126(1.76%) സ്‌കൂളുകളാണുള്ളത്. ഇനി കോളേജുകളുടെ കാര്യമെടുത്താല്‍, കേരളത്തിലാകെ 204 എയ്ഡഡ് കോളേജുകളാണുള്ളത് എന്ന് കാണാം. ഇതില്‍ 95 എണ്ണം ക്രിസ്ത്യന്‍ ഉടമസ്ഥതയിലുള്ള കോളേജുകളാണ്. ഇത് ആകെ എണ്ണത്തിന്റെ 46.57% വരും. 63 കോളേജുകളാണ് ഹിന്ദു സമുദായത്തിന്റെ ഉടമസ്ഥതയിലുള്ളത്. ഇത് 30.88% വരും. അതേസമയം, മുസ്‌ലിം സമുദായത്തിന്റെ ഉടമസ്ഥതയില്‍ 38 കോളേജുകളാണുള്ളത്. ഇത് ആകെ എണ്ണത്തിന്റെ 18.63 ശതമാനമാണ്. മറ്റുള്ളവരുടെ ഉടമസ്ഥതയിലുള്ളത് 8 കോളേജുകളാണ്. ഇത് 3.92% വരും.
മലബാര്‍ മേഖലയില്‍ ആകെ 62 കോളേജുകളാണുള്ളത്. ഇതില്‍ 29 എണ്ണം മുസ്‌ലിം സമുദായത്തിന്റെ ഉടമസ്ഥതയിലാണ്. ഇത് ആകെ കോളേജുകളുടെ എണ്ണത്തിന്റെ 14.22% വരും. ഹിന്ദു സമുദായത്തിന്റെ ഉടസ്ഥതയില്‍ പതിനഞ്ചും ക്രിസ്ത്യന്‍ സമുദായത്തിന്റെ ഉടമസ്ഥതയില്‍ പതിനൊന്നും കോളേജുകളാണുള്ളത്. ഇത് മൊത്തം കോളേജുകളുടെ യഥാക്രമം 7.35%, 5.39% എന്ന് വരും. മറ്റുള്ളവരുടെ ഉടമസ്ഥതയില്‍ 7 കോളേജുകളാണുള്ളത്. ഇത് 3.43% വരും. കേരളത്തിലെ ആകെ കോളേജുകളില്‍ 69.61 ശതമാനവും മധ്യ-തെക്കന്‍ കേരളത്തില്‍ ആണ് സ്ഥിതിചെയ്യുന്നത്. ഇതില്‍ 84 എണ്ണം ക്രിസ്ത്യന്‍ ഉടമസ്ഥതയിലുള്ളതാണ്. ഇത് ആകെ കോളേജുകളുടെ എണ്ണത്തിന്റെ 41.17% വരും. ഇവിടെ, 48 കോളേജുകളാണ് (23.53%) ഹിന്ദു ഉടമസ്ഥതയിലുള്ളത്. മുസ്‌ലിം സമുദായത്തിന്റെ ഉടമസ്ഥതയില്‍ 9 കോളേജുകളാണുള്ളത്. ഇത് ആകെ എണ്ണത്തിന്റെ 4.41% വരും. മറ്റുള്ളവരുടെ ഉടമസ്ഥതയില്‍ ഒരു കോളേജ് മാത്രമാണുള്ളത്.
