‘മോർണിംഗ് കൺസൾട്ട് പൊളിറ്റിക്കൽ ഇന്റലിജൻസ്’ എന്ന അമേരിക്കൻ സ്ഥാപനം, ലോകത്തെ ഏറ്റവും ജനപ്രീതിയുള്ള പ്രധാനമന്ത്രിയായി നരേന്ദ്രമോദിയെ തെരെഞ്ഞെടുത്തിരുന്നു. അതാത് രാജ്യങ്ങളിൽ നടത്തിയ സർവേയുടെ ഭാഗമായാണ് ജനപ്രിയ പ്രധാനമന്ത്രിയെ തെരഞ്ഞെടുത്തത് എന്നാണ് മോർണിംഗ് കൺസൾട്ട് അവകാശപ്പെടുന്നത്. മോർണിംഗ് കൺസൾട്ടിന്റെ സർവേ രീതിശാസ്ത്രം പരിശോധിക്കുന്നു.
ആരാണ് മോർണിംഗ് കൺസൾട്ട്
‘മോണിംഗ് കൺസൾട്ട് പൊളിറ്റിക്കൽ ഇന്റലിജൻസ്’ നിലവിൽ ഓസ്‌ട്രേലിയ, ഓസ്ട്രിയ, ബെൽജിയം, ബ്രസീൽ, കാനഡ, ചെക്ക് റിപ്പബ്ലിക്, ഫ്രാൻസ്, ജർമ്മനി, ഇന്ത്യ, അയർലൻഡ്, ഇറ്റലി, ജപ്പാൻ, മെക്‌സിക്കോ, നെതർലാൻഡ്‌സ്, നോർവേ, പോളണ്ട്, എന്നിവിടങ്ങളിലെ സർക്കാർ നേതാക്കന്മാരുടെയും ഓരോ രാജ്യത്തിന്റെയും വളർച്ചയെ കുറിച്ചും സർവേ നടത്തുന്നവരാണ്. ലോകമെമ്പാടുമുള്ള, മാറിക്കൊണ്ടിരിക്കുന്ന രാഷ്ട്രീയ സാഹചര്യങ്ങളെ കുറിച്ച് ഏറ്റവും പുതിയ ഡാറ്റകൾ നല്കികൊണ്ടിരിക്കുക എന്നതാണ് മോർണിംഗ് കൺസൾട്ട് ചെയ്യുന്നത്. പ്രധാനമായും വ്യവസായം, രാഷ്ട്രീയം, സാമ്പത്തിക ശാസ്ത്രം എന്നിവയെ മുൻനിർത്തിയാണ് ഇവരുടെ സർവേകൾ നടക്കാറുള്ളത്.
രീതിശാസ്ത്രം
മോണിംഗ് കൺസൾട്ടിന്റെ ഒരു പ്രൊപ്രൈറ്ററി പ്ലാറ്റ്‌ഫോമാണ് പൊളിറ്റിക്കൽ ഇന്റലിജൻസ്. കൂടാതെ തിരഞ്ഞെടുപ്പുകൾ, തിരഞ്ഞെടുക്കപ്പെട്ട ഉദ്യോഗസ്ഥർ, വോട്ടിംഗ് പ്രശ്നങ്ങൾ എന്നിവയെക്കുറിച്ചുള്ള തത്സമയ പോളിംഗ് ഡാറ്റ നൽകുകയും, മോർണിംഗ് കൺസൾട്ട് പ്രതിദിനം 20,000-ലധികം അഭിമുഖങ്ങൾ നടത്തുകയും ചെയ്യുന്നു.
തെരഞ്ഞെടുക്കുന്ന ആളുകളുടെ ഏഴ് ദിവസത്തെ വോട്ടിങ്ങിൻ്റെ ശരാശരിയുടെ അടിസ്ഥാനത്തിലാണ് ആഗോള നേതാവിന്റെയും രാജ്യത്തിന്റെ വളർച്ചയുടെയും ഡാറ്റ ശേഖരിക്കുന്നത്. യുണൈറ്റഡ് സ്റ്റേറ്റ്സിൽ, ശരാശരി സാമ്പിൾ വലുപ്പം ഏകദേശം 45,000 ആണ്. മറ്റ് രാജ്യങ്ങളിൽ, സാമ്പിൾ വലുപ്പം ഏകദേശം 500-5,000 വരെയുമാണ്.
മുതിർന്നവരുടെ ദേശീയ പ്രാതിനിധ്യ സാമ്പിളുകൾക്കിടയിൽ എല്ലാ അഭിമുഖങ്ങളും ഓൺലൈനായി നടത്തുന്നു. ഇന്ത്യയിൽ, സാമ്പിൾ സാക്ഷരരായ ജനസംഖ്യയുടെ പ്രതിനിധിയാണ്.
ഓരോ രാജ്യത്തും പ്രായം, ലിംഗഭേദം, പ്രദേശം, ചില രാജ്യങ്ങളിൽ ഔദ്യോഗിക സർക്കാർ സ്രോതസ്സുകളെ അടിസ്ഥാനമാക്കിയുള്ള വിദ്യാഭ്യാസ തകർച്ചകൾ എന്നിവ അനുസരിച്ചാണ് സർവേകൾ കണക്കാക്കുന്നത്. യുണൈറ്റഡ് സ്റ്റേറ്റ്സിൽ, സർവേകളിൽ വംശവും വംശീയതയും കൂടി ഉൾപ്പെടുത്തുന്നു.
ജനുവരി 26 – 31 വരെയുള്ള കാലയളവിൽ നടത്തിയ ഓൺലൈൻ സർവേയിലാണ് ഇന്ത്യൻ പ്രധാനമന്ത്രി നരേന്ദ്രമോദി ലോകത്തെ ഏറ്റവും ജനപ്രിയ പ്രധാനമന്ത്രിയായി റേറ്റ് ചെയ്യപ്പെട്ടത്.
പ്രധാന മാനദണ്ഡങ്ങൾ
- ഓരോ രാജ്യത്തെ പ്രധാനമന്ത്രിക്കും വോട്ട് ചെയ്യുന്നത് അതാത് രാജ്യങ്ങളിലെ തെരഞ്ഞെടുക്കപ്പെടുന്ന ആളുകളാണ്.
- ഈ വോട്ടിങ്ങുകളിൽ ഓരോ രാജ്യത്തെയും 5000 ആളുകളാണ് സർവേക്ക് വേണ്ടി തെരഞ്ഞെടുക്കപ്പെട്ടത്.
- ഒരാഴ്ച്ച കാലയളവ് ആണ് ഈ തെരഞ്ഞെടുപ്പിനുള്ളത്
- ഓൺലൈൻ ആയിട്ടാണ് ആളുകൾ ഈ സർവേയിൽ പങ്കെടുക്കുന്നത്.
ഗുജറാത്ത് കലാപത്തെ കുറിച്ചുള്ള ബി.ബി.സി ഡോകുമെന്ററിയും, അദാനിയെ കുറിച്ചുള്ള ഹിൻഡൻബർഗ് റിപ്പോർട്ടും വന്നതിന് ശേഷമുള്ള ദിവസങ്ങളിലാണ് പ്രസ്തുത സർവേ നടന്നിട്ടുള്ളത്.
സമാനമായ രീതിയിലാണ് രാജ്യത്തിന്റെ വളർച്ചയെ സംബന്ധിച്ചുള്ള വോട്ടെടുപ്പുകളും നടന്നിട്ടുള്ളത്.
തങ്ങളുടെ രാജ്യത്തിന്റെ വളർച്ച ശരിയായ നിലയിലാണോ അതോ തെറ്റായ നിലയിൽ ആണോ പോകുന്നത് എന്നതാണ് ഈ വിഭാഗത്തിലെ പ്രധാന ചോദ്യം.
ഓരോ രാജ്യത്തും പ്രായപൂർത്തിയായ ആളുകളുടെ ഏഴ് ദിവസത്തെ വോട്ടിംഗ് ശരാശരിയെ അടിസ്ഥാനമാക്കിയാണ് ഈ ഡാറ്റ ശേഖരിച്ചിട്ടുള്ളത്.
സാങ്കേതികമായ ചില സംഗതികളെ ഉപയോഗപ്പെടുത്തി ഏറ്റവും പരിമിതമായ ഉറവിടങ്ങളെ അടിസ്ഥാനപ്പെടുത്തിയാണ് ഈ സർവേ നടത്തിയിട്ടുള്ളത്. മാനദണ്ഡങ്ങളെ കുറിച്ച് ധാരണ നൽകുമ്പോഴും സർവേകളിൽ ഉപയോഗിച്ച ചോദ്യങ്ങളെ കുറിച്ചോ, അതിൽ പങ്കെടുത്ത ആളുകളെ കുറിച്ചോ കൃത്യമായ വിവരങ്ങളോ മറ്റോ നൽകുന്നില്ല.
