ഇന്ത്യയിൽ പ്രവർത്തിക്കുന്ന ഓൺലൈൻ മാധ്യമ സ്ഥാപനങ്ങൾ ആരുടെയൊക്കെ ഉടമസ്ഥതയിലാണ് ഉള്ളത്? ഇന്ത്യയിലെ പ്രമുഖ മാധ്യമങ്ങളുടെ ഉടമസ്ഥതയെക്കുറിച്ച് ഫാക്ട് ഷീറ്റ്സ് പ്രസിദ്ധീകരിക്കുന്ന ലേഖനത്തിൻ്റെ മൂന്നാം ഭാഗം.
ഫസ്റ്റ് പോസ്റ്റ്
ഇംഗ്ലീഷ് – ഹിന്ദി ഭാഷകളിൽ വാർത്തകൾ, നിരൂപണങ്ങൾ തുടങ്ങിയവ പ്രസിദ്ധികരിക്കുന്ന വെബ്സൈറ്റ്. നെറ്റ്‌വർക്ക് 18 ആണ് ഉടമസ്ഥർ. 73.2ശതമാനം ഓഹരി അംബാനി കുടുംബത്തിൻ്റേതാണ്.
ദി പ്രിന്റ്
വാർത്തകളും അനുബന്ധ വിശകലനങ്ങളും പ്രസിദ്ധീകരിക്കുന്ന വെബ്സൈറ്റ്. പ്രിന്റ് ലൈൻ മീഡിയ പ്രൈവറ്റ് ലിമിറ്റഡ് ആണ് ഉടമസ്ഥർ.99 ശതമാനം ഓഹരിയും ശേഖർ ഗുപ്തക്കാണ്.
ദി ക്വിന്റ്
ഹിന്ദി ഇംഗ്ലീഷ് ഭാഷകളിൽ വാർത്തകൾ കൊടുക്കുന്ന വെബ്സൈറ്റ്. ക്വിന്റിലൻ മീഡിയ ആണ് ഉടമസ്ഥർ. രാഘവ് ബഹ്‌ലിനും കുടുംബത്തിനുമാണ് 100 ശതമാനം ഓഹരിയും ഉണ്ടായിരുന്നത്. 2022ൽ അദാനി ഗ്രൂപ്പ് 49 ശതമാനം ഓഹരി സ്വന്തമാക്കി.
ദി വയർ
2015ൽ ആരംഭിച്ച വാർത്ത വെബ്സൈറ്റ് ആണ് വയർ. ദി ഫൗണ്ടേഷൻ ഓഫ് ഇൻഡിപെൻഡന്റ് ജേർണലിസം എന്ന കമ്പനിയാണ് ഉടമസ്ഥർ. സിദ്ധാർഥ് വരദരാജൻ, സിദ്ധാർത്ഥ് ഭാട്ടിയ, മംഗളം കേശവൻ വേണു എന്നിവർക്ക് 33.3 ശതമാനം ഓഹരി വീതമാണ് ഉള്ളത്.
സ്ക്രോൾ.ഇൻ
വാർത്തകൾ, ലേഖനങ്ങൾ, നിരൂപണങ്ങൾ എന്നിവ പ്രസിദ്ധികരിക്കുന്ന ഇംഗ്ലീഷ് വെബ്സൈറ്റ്. സ്ക്രോൾ മീഡിയ ഇൻകോർപ്പറേഷനാണ് ഉടമസ്ഥർ. കമ്പനിയുടെ പ്രധാന സ്ഥാനത്തുള്ളത് സ്ക്രോൾ.ഇൻ സ്ഥാപകൻ സമീർ പാട്ടീൽ ആണെങ്കിലും, അദ്ദേഹത്തിന് എത്ര ശതമാനം ഓഹരിയുണ്ട് എന്നതു സംബന്ധിച്ച വിവരങ്ങൾ ലഭ്യമല്ല. സ്ക്രോളിന്റെ ഹിന്ദി പതിപ്പ് തെഹൽക മുൻ സ്ഥാപക എഡിറ്റർ സഞ്ജയ് ദുബേ ‘സത്യാഗ്രഹ്’ എന്ന പേരിൽ സ്ഥാപിച്ചിരുന്നു.
ഹിന്ദുസ്ഥാൻ ടൈംസ് ഓൺലൈൻ
ഹിന്ദുസ്ഥാൻ ടൈംസ് പത്രത്തിൽ വരുന്ന വാർത്തകൾ ലഭ്യമാക്കുന്ന വെബ്സൈറ്റ്. എച്ച്. ടി മീഡിയയുടെ അനുബന്ധ സ്ഥാപനമായ ഫയർ ഫ്ലൈ വെഞ്ചേഴ്‌സാണ് വെബ്സൈറ്റ് നടത്തുന്നത്. 51.4 ശതമാനം ഓഹരി മുൻ കോൺഗ്രസ് രാജ്യസഭാ എം.പി കൂടിയായ ശോഭന ഭർത്യയുടേതാണ്.
ദി ഹിന്ദു ഓൺലൈൻ
1996 ലാണ് ഇന്ത്യയിലെ ഒരു പത്രത്തിന്റെ ആദ്യ വെബ്സൈറ്റ് പതിപ്പായ ഹിന്ദു ഓൺലൈൻ സ്ഥാപിതമാകുന്നത്. ഹിന്ദു ഗ്രൂപ് ആണ് ഉടമസ്ഥർ. കസ്‌തൂരി കുടുംബത്തിനാണ് 100 ശതമാനം ഓഹരിയും.
ദി ഇന്ത്യൻ എക്സ്പ്രസ്
ഇന്ത്യൻ എക്സ്പ്രസ് പത്രത്തിന്റെ വെബ്സൈറ്റ് പതിപ്പ്. എക്സ്പ്രസ് ഗ്രൂപ് ഓഫ് പബ്ലിക്കേഷൻ ആണ് ഉടമസ്ഥർ. 91 ശതമാനം ഓഹരി ഗോയെങ്കി കുടുംബത്തിനും 9 ശതമാനം മുതിർന്ന മാധ്യമ പ്രവർത്തകർ ശേഖർ ഗുപ്തക്കുമാണ് ഉള്ളത്.
ടൈംസ് ഓഫ് ഇന്ത്യ ഓൺലൈൻ
ടൈംസ് ഓഫ് ഇന്ത്യ പത്രത്തിന്റെ വെബ്സൈറ്റ് പതിപ്പ്. ബെന്നറ്റ് കോൾമാൻ & കമ്പനി ലിമിറ്റഡിന്റെ കീഴിലുള്ള ടൈംസ് ഗ്രൂപ് ആണ് പത്രത്തിന്റെ ഉടമസ്ഥർ. ജൈൻ കുടുംബമാണ് കമ്പനിയുടെ ഉടമസ്ഥർ. 100 ശതമാനം ഓഹരിയും ജൈൻ കുടുംബത്തിനാണ്.
കാരവൻ
ആദ്യകാല മാഗസിനുകളിൽ ഒന്നായ കാരവന്റെ ഇംഗ്ലീഷ് ഇന്ത്യൻ വെബ്സൈറ്റ്. 10 ഭാഷകളിലായി 36 ഓളം മാഗസിനുകൾ ഇറക്കുന്ന ഡൽഹി പ്രസ് ആണ് ഉടമസ്ഥർ. 1940ൽ വിശ്വനാഥ് ആരംഭിച്ച മാഗസിൻ 1988 നിർത്തിവെച്ചു തുടർന്ന് അദ്ദേഹത്തിന്റെ പേരമകൻ ആനന്ദ് നാഥ്‌ 2009 ഏറ്റെടുത്ത് വീണ്ടും പ്രസിദ്ധികരണം ആരംഭിച്ചു. പരേഷ് നാഥ്‌ ആണ് നിലവിൽ ഡൽഹി പ്രസ് ഡയറക്ടറും വിനോദ് ജോസ് എക്സിക്യൂട്ടീവ് എഡിറ്ററുമാണ്.
