ഫെബ്രുവരി 5 ന്, സംസ്ഥാന ബജറ്റുമായി ബന്ധപ്പെട്ട് നടന്ന പത്രസമ്മേളനത്തിൽ, ബി ജെ പി സംസ്ഥാന അധ്യക്ഷൻ കെ സുരേന്ദ്രൻ ചില അവകാശവാദങ്ങൾ ഉന്നയിച്ചിരുന്നു. ലോകത്ത് പെട്രോളിയം ഉത്പന്നങ്ങൾക്ക് ഏറ്റവും വില കുറവുള്ള രാജ്യം ഇന്ത്യ ആണെന്നതുൾപ്പടെ സുരേന്ദ്രൻ ഉന്നയിച്ച അവകാശവാദങ്ങളിലെ വസ്തുത പരിശോധിക്കുന്നു.
കെ സുരേന്ദ്രൻ പറഞ്ഞത്:
1 . ” നിങ്ങളുടെ അയൽ രാജ്യങ്ങളിൽ പെട്രോളിന്റെ വിലയെന്താന്ന് നോക്ക്.. ലോകത്ത് പെട്രോളിയം ഉത്പന്നങ്ങളുടെ വില ഏറ്റവും കുറവുള്ള രാജ്യം ഇന്ത്യയാണ്.”
വസ്തുത :
‘ഗ്ലോബൽ പെട്രോൾ പ്രൈസസി’ന്റെ കണക്കുകൾ പ്രകാരം, ലോകത്ത് പെട്രോളിയം ഉത്പന്നങ്ങൾക്ക് ഏറ്റവും കുറവ് വിലയുള്ള രാജ്യങ്ങൾ ഇവയാണ്:
ഡീസൽ
- ഇറാൻ : 0.885 രൂപ / ലിറ്റർ
- വെനെസ്വെല : 1 .313 രൂപ / ലിറ്റർ
- ലിബിയ : 2 .581 രൂപ / ലിറ്റർ
- സൗദി അറേബ്യ : 16.565 രൂപ / ലിറ്റർ
- അൾജീരിയ : 1 7.526 രൂപ / ലിറ്റർ
- ഈജിപ്ത് : 19.630 രൂപ / ലിറ്റർ
എൽ പി ജി
- അൾജീരിയ : 5.437 രൂപ / ലിറ്റർ
- അംഗോള : 16.325 രൂപ / ലിറ്റർ
- സൗദി അറേബ്യ: 19.879 രൂപ / ലിറ്റർ
- റഷ്യ : 21.163 രൂപ / ലിറ്റർ
- അസർബൈജാൻ : 31.678 രൂപ / ലിറ്റർ
ഗ്യാസോലിൻ:
- വെനെസ്വെല : 1.313 രൂപ / ലിറ്റർ
- ലിബിയ : 2.581 രൂപ / ലിറ്റർ
- ഇറാൻ : 4.425 രൂപ / ലിറ്റർ
- അംഗോള: 26.120 രൂപ / ലിറ്റർ
- അൽജീരിയ : 27.773 രൂപ / ലിറ്റർ
- കുവൈറ്റ് : 28.379 രൂപ / ലിറ്റർ
ഇന്ത്യയിൽ പെട്രോളിയം ഉത്പന്നങ്ങളുടെ വില:
- ഡീസൽ : 93.475 രൂപ / ലിറ്റർ
- എൽ പി ജി : 61.498 രൂപ / ലിറ്റർ
- ഗ്യാസോലിൻ : 104.15 രൂപ/ ലിറ്റർ
- മണ്ണെണ്ണ : 55.79 രൂപ / ലിറ്റർ
ഇന്ത്യയുടെ അയൽ രാജ്യങ്ങളിൽ പെട്രോൾ ഉത്പന്നങ്ങളുടെ വില:
പാക്കിസ്ഥാൻ:
- ഡീസൽ : 88.289 രൂപ / ലിറ്റർ
- ഗ്യാസോലിൻ : 85.767 രൂപ/ ലിറ്റർ
- മണ്ണെണ്ണ : 63.925 രൂപ / ലിറ്റർ
ചൈന
- ഡീസൽ : 89.817 രൂപ / ലിറ്റർ
- ഗ്യാസോലിൻ : 100.836 രൂപ/ ലിറ്റർ
ബംഗ്ലാദേശ്
- ഡീസൽ : 84.975 രൂപ / ലിറ്റർ
- ഗ്യാസോലിൻ : 101.346 രൂപ/ ലിറ്റർ
ലോകത്ത് പെട്രോളിയം ഉത്പന്നങ്ങൾക്ക് ഏറ്റവും വില കുറവുള്ള രാജ്യം ഇന്ത്യയാണെന്ന സുരേന്ദ്രന്റെ വാദം തെറ്റാണ്.
2 . ” ഈ രാജ്യത്ത് 1.9 ലക്ഷം രൂപയായി ആളോഹരി വരുമാനം വർധിച്ചു. കണക്കുകൾ കള്ളം പറയില്ല”
വസ്തുത :
ഒരു രാജ്യത്തെ പൗരന്മാരുടെ ശരാശരി വരുമാനമാണ് ആളോഹരി വരുമാനം. രാജ്യത്തെ ജിഡിപിയെ ജനസംഖ്യയാൽ ഹരിച്ചാണ് ഇത് കണ്ടെത്തുന്നത്. ഒരു രാജ്യം അതിന്റെ അതിർത്തിക്കുള്ളിൽ ഉത്പാദിപ്പിക്കുന്ന ചരക്കുകളുടെയും സേവനങ്ങളുടെയും, ഒരു നിശ്ചിത കാലയളവിലെ വിലയുടെ അടിസ്ഥാനത്തിലുള്ള കണക്കാണ് ജി ഡി പി . അളക്കുന്ന വിലയുടെ അടിസ്ഥാനത്തിൽ ജി ഡി പിയെ ‘നോമിനൽ’ – ‘റിയൽ’ എന്നിങ്ങനെ തരം തിരിക്കാം. രാജ്യത്തെ ചരക്ക് – സേവന ഉൽപ്പന്നങ്ങളുടെ, ഒരു നിശ്ചിത കാലയളവിലെ, വിപണിയിലെ വിലനിലവാരം അനുസരിച്ചാണ് നോമിനൽ ജി ഡി പി കണക്കാക്കുന്നത്; ഒരു വർഷത്തെ നോമിനൽ ജി ഡി പി, ആ വർഷം രാജ്യത്തുണ്ടായ മൊത്തം വരുമാനത്തിന്റെ ഏകദേശ അളവാണ്.
എന്നാൽ നോമിനൽ ജി ഡി പിയിൽ കാണുന്ന വർധനവ്, ഭാഗികമായി മാത്രമാണ് ഉൽപ്പാദനത്തിലെ വർധനവായി കണക്കാക്കാൻ കഴിയുക, കാരണം ചരക്കു സേവനങ്ങളുടെ വിലക്കയറ്റത്തിലൂടെയും ഇത് സാധ്യമാണ്. എന്നാൽ വിലക്കയറ്റം മാറ്റി നിർത്തി ഉൽപ്പാദനത്തിന്റെ വർധനവ് അനുസരിച്ചുള്ള വളർച്ച അറിയാൻ റിയൽ ജിഡിപിയാണ് ഉപയോഗിക്കുക. വില സൂചിക ഉപയോഗിച്ച് നോമിനൽ ജിഡിപി പണപ്പെരുപ്പത്തിനനുസരിച്ച് ക്രമീകരിച്ചുകൊണ്ടാണ് റിയൽ ജി ഡി പി കണക്കാക്കുക.
‘റിസേർവ് ബാങ്ക് ഓഫ് ഇന്ത്യ’യുടെ കണക്കുകൾ പ്രകാരം ആളോഹരി വരുമാനം (റിയൽ ജി ഡി പി) 1.9 ലക്ഷം രൂപയായി വർധിച്ചിട്ടില്ല. 2021-22 ലെ കണക്കുകൾ പ്രകാരം ഇന്ത്യയിലെ ആളോഹരി വരുമാനം (റിയൽ ജി ഡി പി) 1,07,670 രൂപയാണ്.
നോമിനൽ ജി ഡി പി ആളോഹരി വരുമാനം പൗരന്മാരുടെ വരുമാന വളർച്ച കണക്കുകൂട്ടാൻ ഉത്തമമല്ലെന്നതിനാൽ, ആളോഹരി വരുമാനത്തിലെ വർദ്ധനവ് സംബന്ധിച്ച കെ പി സുരേന്ദ്രന്റെ അവകാശവാദം തെറ്റിധാരണ ജനകമാണ്.