“ബി.ജെ.പിയുടെ നേതൃത്വത്തിലുള്ള എൻ.ഡി.എ സർക്കാർ കേരളത്തിലെ ജനങ്ങളുടെ ആവശ്യങ്ങളും പ്രതീക്ഷകളും അതിനനുസരിച്ച് സംവേദനക്ഷമമായ പ്രവർത്തനങ്ങളുമാണ് മുന്നോട്ട് വെക്കുന്നത്‌. ദരിദ്ര കുടുംബങ്ങൾക്ക് സുരക്ഷിതമായ വീടുകൾ നൽകുന്നതിനുള്ള പദ്ധതികൾ നടപ്പിലാക്കിക്കൊണ്ടിരിക്കുകയാണ്. പ്രധാനമന്ത്രി ആവാസ് യോജന പ്രകാരം കേരളത്തിൽ രണ്ട് ലക്ഷത്തോളം വീടുകൾ നിർമിക്കുന്നതിനുള്ള നടപടികൾ സ്വീകരിച്ച് കഴിഞ്ഞു. ഏതാണ്ട് ഒരു ലക്ഷത്തോളം വീടുകൾ പൂർത്തികരിച്ചിരിക്കുന്നു എന്ന് പറയാൻ എനിക്ക് സന്തോഷമുണ്ട്”.
സെപ്റ്റംബർ ഒന്നാം തീയതി കൊച്ചിയിൽ നടന്ന പൊതുസമ്മേളനത്തിലാണ് പ്രധാനമന്ത്രി ഈ പ്രസ്താവന നടത്തിയത്.
വീട് നിർമ്മാണം സംബന്ധിച്ച് ഇതിൽ പറഞ്ഞ കാര്യങ്ങൾ വസ്തുതാപരമാണോ? ഫാക്റ്റ് ഷീറ്റ്സ് പരിശോധിക്കുന്നു.
എന്താണ് കേന്ദ്ര സർക്കാരിന്റെ പ്രധാനമന്ത്രി ആവാസ് യോജന (പി.എം.എ.വൈ)?
ഗ്രാമപ്രദേശങ്ങൾക്കുള്ള പി.എം.എ.വൈ റൂറൽ പദ്ധതിയിൽ കേന്ദ്രസർക്കാർ നൽകുന്നത് വെറും 72000 രൂപയാണ്. നഗര മേഖലയിലെ പി.എം.എ.വൈ അർബൻ പദ്ധതിയിൽ കേന്ദ്രം നൽകുന്നത് ഒന്നര ലക്ഷവും. ഒറ്റ കിടപ്പുമുറി എന്ന ആശയത്തിലാണ് കേന്ദ്ര സർക്കാരിന്റെ പദ്ധതി വിഭാവനം ചെയ്യപ്പെട്ടിരിക്കുന്നത്. ഭവന നിർമ്മാണ പദ്ധതിയിൽ ഗുണഭോക്തൃ വിഹിതവും കൂടി ഉൾപ്പെടുത്തണം എന്നതാണ് കേന്ദ്രത്തിൻ്റെ കാഴ്ച്ചപ്പാട്.
കേരളം ഒഴികെയുള്ള സംസ്ഥാനങ്ങളിലെ അവസ്ഥ രാജ്യത്ത് കേന്ദ്ര-സംസ്ഥാന സർക്കാരുകളുടെ സംയുക്ത സംരംഭമായ പി.എം.എ.വൈ (ഗ്രാമീൺ) പദ്ധതി വഴി ഒരു വീടിന് ആകെ ചെലവ് നിശ്ചയിച്ചത് വെറും 1.2 ലക്ഷം രൂപയാണ്. ഇതിൽ കേന്ദ്രത്തിൽ നിന്നും ലഭിക്കുന്ന വിഹിതമായ 72,000 രൂപ കഴിച്ചുള്ള ബാക്കി തുക നൽകേണ്ടത് സംസ്ഥാന സർക്കാരാണ്.
പി.എം.എ.വൈ അർബൻ പദ്ധതിയിൽ 3 ലക്ഷം രൂപയാണ് വീട് നിർമ്മാണത്തിനായി കണക്കാക്കിയിട്ടുള്ളത്. അതിൽ കേന്ദ്രം നൽകുന്നത് ഒന്നര ലക്ഷമാണ്. ബാക്കി ഒരു ലക്ഷം സംസ്ഥാന സർക്കാരുകൾ വഹിക്കണമെന്നാണ് പദ്ധതി. അര ലക്ഷം ഉപഭോക്തൃ വിഹിതമായി നൽകേണ്ടതാണ് എന്നാണ് നിശ്ചയിച്ചത്.
കേരളത്തിൽ എന്താണ് നടക്കുന്നത്?
ലൈഫ് പദ്ധതിയുടെ ഭാഗമായി 4-6 ലക്ഷം വരെ സംസ്ഥാന സർക്കാർ വീട് നിർമിക്കാൻ നീക്കി വെക്കുന്നു. ഇതിൽ കേന്ദ്ര വിഹിതം പൂജ്യമാണ്. ഉപഭോക്തൃ വിഹിതവും ഇല്ല. ലൈഫ് പദ്ധതിയുടെ ഭാഗമായാണ് കേരളത്തിൽ പി.എം.എ.വൈ പദ്ധതിയും നടപ്പിലാക്കുന്നത്. ലൈഫ് പി.എം.എ.വൈ റൂറൽ, ലൈഫ് പി.എം.എ.വൈ അർബൻ എന്നീ പേരുകളിൽ. എന്നാൽ ഇത് മറ്റ് സംസ്ഥാനങ്ങളിലെ പി.എം.എ.വൈ പദ്ധതി പോലെയല്ല കേരളത്തിൽ. വീടിന് നാല് ലക്ഷം രൂപയാണ് കണക്കാക്കിയിട്ടുള്ളത്.
ലൈഫ് പി.എം.എ.വൈ റൂറൽ:
ആകെ ചെലവ് : 4 ലക്ഷം.
കേന്ദ്ര വിഹിതം : 72000 മാത്രം.
കേരളത്തിന്റെ വിഹിതം: 3.28 ലക്ഷം
ഉപഭോക്തൃ വിഹിതം : പൂജ്യം
ലൈഫ് പി.എം.എ.വൈ അർബൻ:
ആകെ ചെലവ്: 4 ലക്ഷം.
കേന്ദ്ര വിഹിതം: 1.5 ലക്ഷം
കേരളത്തിന്റെ വിഹിതം: 2.5ലക്ഷം
ഉപഭോക്തൃ വിഹിതം: പൂജ്യം
അതായത്, ഗ്രാമപ്രദേശങ്ങൾക്കുള്ള പി.എം.എ.വൈ റൂറൽ – പദ്ധതിയിൽ കേന്ദ്രസർക്കാർ നൽകുന്നത് വെറും 72000 രൂപയാണ്. കേരളത്തിൽ വീട് വെക്കാൻ നാല് ലക്ഷം രൂപ നൽകുന്ന ലൈഫ് പദ്ധതിയുമായി ഇതിനെ യോജിപ്പിച്ചപ്പോൾ ബാക്കി 3,28,000 രൂപയും നൽകിയത് സംസ്ഥാനമാണ്.
പി.എം.എ.വൈ അർബൻ പദ്ധതി വഴി കേന്ദ്രം നൽകുന്ന ധനസഹായം ഒന്നര ലക്ഷം രൂപ മാത്രമാണ്. കേരളത്തിൽ ലൈഫ് മിഷനുമായി യോജിപ്പിച്ച് ബാക്കി രണ്ടര ലക്ഷം സംസ്ഥാന സർക്കാരാണ് നൽകുന്നത്.
ഇതുവരെ രണ്ട് പദ്ധതിപ്രകാരവും പുർത്തിയായ വീടുകളുടെ പട്ടിക താഴെ:
പി.എം.എ.വൈ അർബൻ
അനുവദിച്ചത്‌: 1,23,246
തീർന്നത്‌: 74200
പി.എം.എ.വൈ റൂറൽ
അനുവദിച്ചത്‌: 42104
തീർന്നത്‌: 21161
