2022 ഒക്ടോബർ 26ന്, ‘ഋഷി സുനകും സോണിയ ഗാന്ധിയും’ എന്ന തലക്കെട്ടിൽ മീഡിയ വൺ ചാനലിൽ നടന്ന First Debate ചർച്ചയിൽ ആർ.എസ്.എസ് വക്താവും കേരളത്തിലെ അവരുടെ മുതിർന്ന നേതാവുമായ കാ. ഭാ സുരേന്ദ്രൻ, മുതിർന്ന കോൺഗ്രസ് നേതാവ് സോണിയ ഗാന്ധിക്ക് ഇരട്ട പൗരത്വം ഉണ്ടെന്ന് വാദിച്ചിരുന്നു.
കാ. ഭാ സുരേന്ദ്രന്റെ വാദം:
“അവർ ഇന്ത്യൻ പൗരത്വം സ്വീകരിക്കുമ്പോഴും ഇറ്റാലിയൻ പൗരത്വം അവർക്ക് നഷ്ടപ്പെടുന്നില്ല എന്നതും കൂടി നമ്മൾ ഓർക്കേണ്ടതുണ്ട്. ഇരട്ട പൗരത്വം ഉള്ളൊരാളാണ് അവർ”
അതിനാലാണ് സോണിയ ഗാന്ധിയെ തങ്ങൾക്ക് അംഗീകരിക്കാൻ സാധിക്കാത്തത് എന്നും, ഇറ്റാലിയൻ പൗരത്വം നിലനിർത്തിക്കൊണ്ട് ഇന്ത്യൻ പൗരത്വം സ്വീകരിക്കുമ്പോൾ രാജ്യത്തിന്റെ പ്രധാനമന്ത്രി ആകാൻ അവർക്ക് കഴിയില്ല എന്നും കാ. ഭാ സുരേന്ദ്രൻ പറയുന്നു. അതിന് തെളിവായി അദ്ദേഹം മുന്നോട്ട് വെക്കുന്നത് എസ്.ഗുരുമൂർത്തിയുടെ ‘Sonia: In the perception of a nationalist’ എന്ന പുസ്തകമാണ്.
ഇന്ത്യയിലെ പൗരത്വത്തെ കുറിച്ചുള്ള പ്രാഥമിക അവലംബം എന്താണ്? കാ. ഭാ സുരേന്ദ്രൻ ഉന്നയിച്ച വാദത്തിന്റെ യാഥാർഥ്യം എത്രത്തോളമാണ്? രാജ്യത്തെ പൗരത്വവുമായി ബന്ധപ്പെട്ട് ഇന്ത്യയിൽ നിലനിൽക്കുന്ന നിയമങ്ങൾ എന്തൊക്കെയാണ് എന്നിവ ഫാക്ട്ഷീറ്റ്‌സ് പരിശോധിക്കുന്നു.
ഇന്ത്യൻ പൗരത്വത്തെ സംബന്ധിച്ച പ്രാഥമികവും ആധികാരികവുമായ അവലംബം ഇന്ത്യൻ ഭരണഘടനയാണ്.
ആ ഭരണഘടന പ്രകാരം ഇന്ത്യൻ പൗരത്വവും മറ്റൊരു രാജ്യത്തെ പൗരത്വവും ഒരുമിച്ച് കൈവശം വെക്കാൻ ഇന്ത്യയിൽ സാധ്യമല്ല.
ഭരണഘടനയുടെ 1955-ലെ ഇന്ത്യൻ പൗരത്വനിയമം 5 മുതൽ 11 വരെയുള്ള വകുപ്പുകളാണ് ഇന്ത്യൻ പൗരത്വനിയമം എന്നറിയപ്പെടുന്നത്.
ഇന്ത്യൻ പൗരത്വനിയമം അനുസരിച്ച് പൗരത്വം ലഭിക്കുന്നതിനെ ഇങ്ങനെ നിർവ്വചിക്കാം:
- 1950 ജനുവരി 26-നോ ശേഷമോ രാജ്യത്ത് ജനിച്ചവരെല്ലാം ഇന്ത്യൻ പൗരന്മാരാണ്.
ഒരു കുട്ടി വിദേശത്താണ് ജനിക്കുന്നതെങ്കിൽ പോലും ആ സമയത്ത് മാതാപിതാക്കളിൽ ഒരാൾക്ക് ഇന്ത്യൻ പൗരത്വം ഉണ്ടെങ്കിൽ ആ കുട്ടിയും ഇന്ത്യൻ പൗരനാണ്. - ഇന്ത്യക്കാരെ വിവാഹം ചെയ്യുന്നവരുൾപ്പെടെയുള്ള വിവിധ ജനവിഭാഗങ്ങളിൽ പെടുന്നവർക്ക് വ്യവസ്ഥകൾക്ക് വിധേയമായി അപേക്ഷ നൽകിയും പൗരത്വം നേടാം.
- വിദേശികൾക്കും ഇന്ത്യാ ഗവണ്മെന്റിനോട് അപേക്ഷിച്ച് പൗരത്വം നേടാം.
- ഏതെങ്കിലും ഭൂപ്രദേശം ഇന്ത്യയോടുകൂടി ചേർക്കുകയാണെങ്കിൽ അവിടെ ജീവിക്കുന്നവർ സ്വാഭാവികമായി ഇന്ത്യൻ പൗരന്മാരാകും.
അതുപോലെ പ്രധാനമായും മൂന്ന് കാരണങ്ങൾ കൊണ്ട് ഒരാൾക്ക് ഇന്ത്യൻ പൗരത്വം നഷ്ടമാവാം
- സ്വമേധയാ പൗരത്വം ഉപേക്ഷിക്കാം.
- മറ്റൊരു രാജ്യത്ത് പൗരത്വം നേടുന്നതു വഴി നഷ്ടപ്പെടാം.
- നിയമത്തിലെ വ്യവസ്ഥകൾക്ക് വിധേയമായി ചില സന്ദർഭങ്ങളിൽ സർക്കാരിന് ഒരു പൗരന്റെ പൗരത്വം നിഷേധിക്കാം.
ഭരണഘടന അനുച്ഛേദം 9 പ്രകാരം ‘ഏതെങ്കിലും വിദേശ രാജ്യങ്ങളിലെ പൗരത്വം ആർജിച്ചിട്ടുള്ള ഒരാൾക്ക്, ഇന്ത്യൻ പൗരത്വം നിഷേധിക്കപ്പെട്ടതാണ്’.
അഥവാ ഇന്ത്യൻ ഭരണഘടനയിലെ പൗരത്വ നിയമപ്രകാരം മറ്റൊരു രാജ്യത്തെ പൗരത്വം എടുക്കുന്ന ഒരാൾക്ക് അത് കാരണമായി ഇന്ത്യൻ പൗരത്വം നഷ്ടമാകും.
എന്ന് മാത്രമല്ല 1967ലെ പാസ്‌പോർട്ട് നിയമം അനുസരിച്ച് ഒരു ഇന്ത്യക്കാരൻ രണ്ടാമതൊരു പാസ്‌പോർട്ട് സ്വന്തമാക്കുകയാണെങ്കിൽ, അവർക്ക് ഇന്ത്യൻ പൗരത്വം നഷ്ടപ്പെടും. ‘എല്ലാ ഇന്ത്യൻ പാസ്‌പോർട്ട് ഉടമകളും മറ്റൊരു രാജ്യത്തിന്റെ പൗരത്വം നേടിയ ഉടൻ തന്നെ തങ്ങളുടെ പാസ്‌പോർട്ടുകൾ അടുത്തുള്ള ഇന്ത്യൻ മിഷനിൽ അല്ലെങ്കിൽ പോസ്റ്റലായോ സമർപ്പിക്കണം’ എന്നും പ്രസ്തുത നിയമത്തിൽ വ്യക്തമാക്കുന്നു.
ഭരണഘടന അനുച്ഛേദങ്ങൾ അനുസരിച്ചും ഇന്ത്യയിലെ പൗരത്വ നിയമങ്ങൾ പ്രകാരവും ഇന്ത്യയിൽ ഒരാൾക്ക് ഇരട്ട പൗരത്വം നേടാൻ സാധ്യമല്ല. ഒരു സാധാരണ വ്യക്തിക്ക് അത് സാധ്യമല്ലെന്നിരിക്കെ ദീർഘകാലമായി ഇന്ത്യൻ പാർലമെന്റ് അംഗം കൂടിയായ സോണിയ ഗാന്ധി ഇരട്ട പൗരത്വമുണ്ട് എന്ന് പറയുന്ന വാദം ഭരണഘടന വിരുദ്ധവും അവാസ്തവുമാണ്.
