2022 ഒക്ടോബർ 27 ന്, ‘ആംആദ്മിയുടെ വിശ്വരൂപം’ എന്ന തലക്കെട്ടിൽ മീഡിയ വൺ ചാനലിൽ നടന്ന First Debate ചർച്ചയിൽ, ഹിന്ദു ഐക്യവേദി വക്താവ് ആർ.വി ബാബു, മുസ്ലിംകൾക്ക് സർക്കാരിൽ നിന്ന് ലഭിക്കുന്ന ആനുകൂല്യങ്ങളെ സംബന്ധിച്ച് ചില വാദങ്ങൾ ഉന്നയിച്ചിരുന്നു. എന്നാൽ വർഗീയമായ ഈ രണ്ട് പരാമർശങ്ങളും വസ്തുതാവിരുദ്ധമാണ്.
ആർ.വി ബാബുവിന്റെ പരാമർശം:
“തുല്യതയില്ല നമ്മുടെ നാട്ടിൽ. ഇവിടെ, ഒന്നാം ക്ലാസ് മുതൽ പത്താം ക്ലാസ്സിൽ വരെ പഠിക്കുന്ന മുസ്ലിം കുട്ടികൾക്ക് ആയിരം രൂപ സ്കോളർഷിപ് കൊടുക്കുമ്പോൾ പട്ടിക ജാതിക്കാരന് കൊടുക്കുന്നില്ല. മുസ്ലിം വിധവകൾക്ക് രണ്ട് ലക്ഷം രൂപ ധനസഹായം കൊടുക്കുന്നു, ഹിന്ദു വിധവകൾക്ക് കൊടുക്കുന്നില്ല.”
വസ്തുത :
- മുസ്ലിം വിദ്യാർത്ഥികൾക്ക് മാത്രമായി ഇത്തരമൊരു സ്കോളർഷിപ്പ് നിലവിലില്ല. 2006 ജൂണിൽ പ്രഖ്യാപിച്ച, ‘Prime Minister’s 15 Point Programme for Minorities’ ന്റെ കീഴിൽ, ഇന്ത്യയിലെ ന്യുനപക്ഷ വിഭാഗത്തിൽ പെട്ട, യോഗ്യരായ വിദ്യാർത്ഥികൾക്ക് സ്കൂൾ വിദ്യാഭ്യാസം ഉറപ്പാക്കുന്നതിനായി രൂപീകരിച്ചതാണ് ‘Pre-Matric Scholarship’ പദ്ധതി. കേന്ദ്ര സർക്കാർ വിജ്ഞാപനം ചെയ്തിട്ടുള്ള: മുസ്ലീം, ക്രിസ്ത്യൻ, ബുദ്ധ, സിഖ്, പാഴ്സി, ജൈനർ എന്നിങ്ങനെ ഇന്ത്യയിലെ ആറ് ന്യൂനപക്ഷ സമുദായങ്ങളിലെ, അധഃസ്ഥിതരും ദുർബലരുമായ വിഭാഗങ്ങൾക്ക്, വിവിധ സർക്കാർ ക്ഷേമ പദ്ധതികൾ പ്രയോജനപ്പെടുത്തുന്നതിന് തുല്യ അവസരങ്ങൾ ലഭിക്കുന്നുവെന്ന് ഉറപ്പാക്കുകയും, അതിലൂടെ രാജ്യത്തിന്റെ സാമ്പത്തിക വികസനം സാധ്യമാക്കുകയും ചെയ്യുക എന്ന ലക്ഷ്യത്തോടെ രൂപകൽപന ചെയ്ത പദ്ധതിയാണ് ‘Prime Minister’s 15 Point Programme for Minorities’.
ന്യൂനപക്ഷ സമുദായങ്ങളിൽ നിന്നുള്ള രക്ഷിതാക്കളുടെ സാമ്പത്തിക ഭാരം ലഘൂകരിക്കുന്നതിനും, കുട്ടികളെ സ്കൂളിൽ അയക്കാൻ അവർക്ക് പ്രോത്സാഹനം നൽകുന്നതിനും ലക്ഷ്യമിട്ടുള്ളതാണ് പ്രീ-മെട്രിക് തലത്തിലുള്ള സ്കോളർഷിപ്പ് പദ്ധതി. പദ്ധതിയുടെ വിശദാംശങ്ങൾ:
ഒരു ലക്ഷത്തിൽ താഴെ വാർഷിക വരുമാനമുള്ള, മുസ്ലീം, ക്രിസ്ത്യൻ, ബുദ്ധ, സിഖ്, പാഴ്സി, ജൈനർ എന്നീ വിഭാഗങ്ങളിൽ നിന്നുള്ള തിരഞ്ഞെടുത്ത ഉദ്യോഗാർത്ഥികൾക്കാണ് സ്കോളർഷിപ്പ് ലഭിക്കുക.
സ്കോളർഷിപ്പ് ആനുകൂല്യങ്ങൾ:
- 6 മുതൽ 10 വരെ ക്ലാസുകളിലേക്കുള്ള പ്രവേശന ഫീസ് – പ്രതിവർഷം 500 രൂപ
- 6 മുതൽ 10 വരെ ക്ലാസുകൾക്കുള്ള ട്യൂഷൻ ഫീസ് – പ്രതിമാസം 350
- ഒരു അധ്യയന വർഷത്തിലെ, 10 മാസത്തേക്കുള്ള മെയിന്റനൻസ് അലവൻസ്:
1 . 1 മുതൽ 5 വരെയുള്ള ക്ലാസുകൾക്ക് – പ്രതിമാസം 100 രൂപ
2 . 6 മുതൽ 10 വരെ ക്ലാസുകൾക്ക് – ഹോസ്റ്റലിൽ താമസിച്ചു പഠിക്കുന്നവർക്ക് പ്രതിമാസം 600 രൂപയും ഡേ സ്കോളർമാർക്ക് പ്രതിമാസം 100 രൂപയും.
പട്ടിക ജാതിയിൽ പെട്ട വിദ്യാർത്ഥികൾക്ക് ഇത്തരം ആനുകൂല്യങ്ങൾ ലഭിക്കുന്നില്ലെന്ന വാദവും തെറ്റാണ്. ഇന്ത്യയിലെ വിവിധ സംസ്ഥാന സർക്കാരുകൾക്ക് കീഴിൽ, പട്ടികജാതിയിൽ പെട്ട വിദ്യാർത്ഥികൾക്കായുള്ള പ്രീ മെട്രിക് സ്കോളർഷിപ്പ് പദ്ധതികൾ നിലവിലുണ്ട്. കേരള പട്ടികജാതി വികസന വകുപ്പിന് കീഴിൽ പട്ടിക ജാതിയിൽ പെട്ട വിദ്യാർത്ഥികൾക്കായി ‘Lump sum grant’, ‘Tuition Fees re-imbursement for children studying in unaided schools’ തുടങ്ങി നിരവധി പദ്ധതികൾ നിലവിലുണ്ട്.
- മുസ്ലിം വിധവകൾക്കായി രണ്ട് ലക്ഷം രൂപ ധനസഹായം അനുവദിക്കുന്ന പദ്ധതികളൊന്നും നിലവിലില്ലെന്നാണ് ഫാക്റ്റ്ഷീറ്റ്സ് നടത്തിയ അന്വേഷണത്തിൽ കണ്ടെത്താനായത്. ഇത് സംബന്ധിച്ച് ആർ വി ബാബുവിനെ ബന്ധപ്പെടുകയും, അദ്ദേഹത്തോട് പദ്ധതിയുടെ വിശദാംശങ്ങൾ ആവശ്യപ്പെടുകയും ചെയ്തിരുന്നു. ന്യൂനപക്ഷ ക്ഷേമ വകുപ്പിന് കീഴിൽ, മുസ്ലിം, ക്രിസ്ത്യൻ തുടങ്ങിയ ന്യുനപക്ഷ വിഭാഗങ്ങളിൽ പെട്ട വിധവകൾക്കായുള്ള ഭവന പുനരുദ്ധാരണ പദ്ധതിയെ കുറിച്ചാണ് താൻ പരാമർശിച്ചതെന്ന് അദ്ദേഹം വ്യക്തമാക്കി. എന്നാൽ ന്യൂനപക്ഷക്ഷേമ വകുപ്പിന് കീഴിൽ, മുസ്ലീം, ക്രിസ്ത്യൻ, ബുദ്ധ, സിഖ്, പാഴ്സി, ജൈനർ എന്നീ ന്യൂനപക്ഷ മതവിഭാഗത്തിൽപ്പെടുന്ന വിധവകളുടെയും, വിവാഹബന്ധം വേർപ്പെടുത്തിയവരുടെയും, ഉപേക്ഷിക്കപ്പെട്ടവരുടെയും ഭവന പുനരുദ്ധാരണത്തിനായി നിലവിലുള്ളത് ഇമ്പിച്ചി ബാവ ഭവന പുനരുദ്ധാരണ പദ്ധതിയാണ്. ഈ പദ്ധതി പ്രകാരം ലഭിക്കുന്ന ധനസഹായം 50,000 രൂപയാണ്. അതിനാൽ മുസ്ലിം വിധവകൾക്ക് രണ്ട് ലക്ഷം രൂപ ധനസഹായം ലഭിക്കുന്നുവെന്ന വാദം തെറ്റാണ്.