2022ൽ മാത്രം കേന്ദ്ര സർക്കാർ 3,400ൽ അധികം ട്വിറ്റർ ലിങ്കുകൾ ബ്ലോക് ചെയ്യാനായി ഉത്തരവിട്ടു. വിവരാവകാശം വഴി ലഭ്യമായ കണക്കുകളിലാണ് ഇത് വ്യക്തമാക്കുന്നത്. 2014ൽ സർക്കാർ ബ്ലോക് ചെയ്ത ട്വിറ്റർ ലിങ്കുകളുടെ എട്ടിരട്ടിയാണ് ഈ കണക്ക്.
വിവരാവകാശ പ്രവർത്തകൻ വെങ്കടേഷ് നായികിന്റെ അപേക്ഷയ്ക്കുള്ള മറുപടിയിലാണ് ഈ വിവരം ലഭ്യമായത്.
2021ലെ ഐടി നിയമമനുസരിച്ച് സാമൂഹ്യ, ഡിജിറ്റൽ മാധ്യമങ്ങളിലെ ഉള്ളടക്കങ്ങൾ നിയന്ത്രിക്കുന്നതിനായി, വിവിധ സർക്കാർ വകുപ്പുകൾക്കിടയിൽ നടക്കുന്ന നടപടികളെക്കുറിച്ചുള്ള വിവരങ്ങൾ ലഭ്യമാക്കാൻ നൽകിയ അപേക്ഷ ഇൻഫർമേഷൻ ആൻഡ് ബ്രോഡ്കാസ്റ്റിങ് മന്ത്രാലയത്തിന്റെ സെൻട്രൽ പബ്ലിക് ഇൻഫർമേഷൻ ഓഫീസർ തള്ളിക്കളഞ്ഞിരുന്നു.
ഇത്തരം പരാതികൾ റിവ്യൂ ചെയ്യുന്ന കമ്മിറ്റിയുടെ പ്രവർത്തനങ്ങളെ കുറിച്ചുള്ള വിവരങ്ങൾ വിവരാവകാശ നിയമത്തിന്റെ പരിധിയിൽ വരില്ല എന്നാണ് ഇൻഫർമേഷൻ ആൻഡ് ബ്രോഡ്കാസ്റ്റിങ് മിനിസ്ട്രിയുടെ സെൻട്രൽ പബ്ലിക് ഇൻഫർമേഷൻ ഓഫീസർ നൽകിയ മറുപടി. പക്ഷേ നാൽപത് ദിവസങ്ങൾക്ക് ശേഷം ഈ അപേക്ഷയിലെ ചില ചോദ്യങ്ങൾക്ക് പബ്ലിക് ഇൻഫർമേഷൻ ഓഫീസർ മറുപടി നൽകി. ബ്ലോക് ചെയ്യാനുള്ള ഉള്ളടക്കങ്ങൾ/ പോസ്റ്റുകൾ എന്നിവയെക്കുറിച്ചുള്ള പരാതികൾ പരിശോധിക്കുന്നതിനായി 2021ൽ 39 തവണയും 2022ൽ 53 തവണയും യോഗം ചേർന്നതായി ഇൻഫർമേഷൻ ആൻഡ് ബ്രോഡ്കാസ്റ്റിങ് മന്ത്രാലയം മറുപടിയിൽ വ്യക്തമാക്കി.
2017ൽ ഇലക്ട്രോണിക്‌സ് ആൻഡ് ഐടി മന്ത്രാലയം പുറപ്പെടുവിച്ചത് 1,385 ബ്ലോക്കിങ് ഉത്തരവുകളാണ്. കോവിഡ് 19 പാൻഡമിക് തുടങ്ങിയ 2020ൽ ഇത് 9849 ആയി വർധിച്ചു. ഈ വിഷയത്തിൽ വിവരങ്ങളന്വേഷിച്ച് നായക് ഒന്നിലധികം ആർ.ടി.ഐകളാണ് ഇലക്ട്രോണിക്‌സ് ആൻഡ് ഐ.ടി മന്ത്രാലയത്തിലും ലോക് സഭ, രാജ്യസഭ സെക്രട്ടേറിയേറ്റുകളിലും സമർപ്പിച്ചത്. ഇലക്ട്രോണിക്‌സ്, ഐ.ടി മന്ത്രാലയം ലോക് സഭയിൽ 2022 ജൂലൈ 27നും രാജ്യസഭയിൽ ജൂലെ 29നും അവതരിപ്പിച്ച വിവരങ്ങൾ വിശകലനം ചെയ്ത് വെങ്കടേഷ് നായക് പറയുന്നത് 2021ൽ ട്വിറ്റർ യു.ആർ.എൽ ബ്ലോക് ചെയ്യാനുള്ള 2,851 കേസുകളാണ് ഉണ്ടായെന്നാണ്. 2022 വരെ 1,122 കേസുകളും.
2022 മാർച്ച് 25ന് ഇലക്ട്രോണിക്‌സ് ആൻഡ് ഐ.ടി മന്ത്രാലയം രാജ്യസഭയിൽ സമർപ്പിച്ച വിവരങ്ങൾ അനുസരിച്ച്, 2021ൽ, ട്വിറ്ററിലും മറ്റു സാമൂഹ്യമാധ്യമങ്ങളിലും 6,096 ലിങ്കുകൾ ബ്ലോക് ചെയ്യാൻ നിർദ്ദേശം നൽകി. 2022ൽ ആർ.ടി.ഐ മറുപടി ലഭിച്ച സമയം വരെ 1264 ലിങ്കുകൾ ബ്ലോക് ചെയ്യാൻ ഉത്തരവിട്ടു.
പാർലമെന്റിൽ അവതരിപ്പിച്ച വിവരങ്ങളനുസരിച്ച് 2021ൽ 2,851 ട്വിറ്റർ യു.ആർ.എൽ ബ്ലോക് ചെയ്യാനുള്ള നിർദ്ദേശം നൽകി. 2022ൽ 3,358 ലിങ്കുകൾ ബ്ലോക് ചെയ്യാനുള്ള നിർദ്ദേശം നൽകി. 2021 മുതൽ 2022 വരെ, ബ്ലോക് ചെയ്യാനുള്ള ഉത്തരവുകളിൽ 3.48 ശതമാനം വർധനവുണ്ടായി.
ഓൺലൈൻ കണ്ടന്റുകൾ ബ്ലോക് ചെയ്യുന്നത് എങ്ങനെ എന്നതിനെ കുറിച്ച് സെൻട്രൽ പബ്ലിക് ഇൻഫർമേഷൻ ഓഫീസർ നൽകിയ വിവരങ്ങൾ പരിമിതമാണ്.
2021, 2022 വർഷങ്ങളിൽ സാമൂഹ്യ മാധ്യമ പോസ്റ്റുകൾ ബ്ലോക് ചെയ്യാൻ കമ്മിറ്റി നൽകിയ ശുപാർശകൾ എല്ലാം സെക്രട്ടറിയുടെ അനുമതി നേടിയ ശേഷമാണ് പരിഗണിച്ചത്. എല്ലാത്തിലും അനുമതി ലഭിക്കുകയും ചെയ്തു. മിനിസ്ട്രി ഇതു സംബന്ധിച്ച തീയ്യതികളുടെ വിശദാംശങ്ങൾ സൂക്ഷിക്കുന്നില്ല എന്നും മറുപടിയിൽ പരാമർശിച്ചിട്ടുണ്ട്. ഈ കമ്മിറ്റിയിൽ പങ്കുവെച്ച വിവരങ്ങൾ നൽകാൻ മിനിസ്ട്രി തയ്യാറായില്ല.
2009ലെ ഐ.ടി നിയമപ്രകാരമുള്ള, ബ്ലോകിങ് നിയമത്തിൽ, രഹസ്യാത്മകത ഉറപ്പുവരുത്തുന്ന ക്ലോസ് ചൂണ്ടിക്കാണിച്ചാണ് ഈ വിവരം വെളിപ്പെടുത്താതിരിക്കുന്നത്.
