ഇന്ത്യൻ പൗരന്മാരിൽ നല്ലൊരു ശതമാനം, പൗരത്വം ഉപേക്ഷിച്ച് വിദേശ നാടുകളിലേക്ക് കുടിയേറുന്നുവെന്ന് റിപ്പോർട്ട്. 2023 ഫെബ്രുവരിയിൽ കേന്ദ്ര വിദേശകാര്യ മന്ത്രി എസ് ജയ്ശങ്കർ പാർലിമെന്റിൽ അവതരിപ്പിച്ച കണക്കുകൾ പ്രകാരം 2011 മുതൽ 2022 വരെയുള്ള കാലയളവിൽ 16,63,440 ആളുകൾ ഇന്ത്യൻ പൗരത്വം ഉപേക്ഷിച്ചിട്ടുണ്ട്. ഇവരിൽ കൂടുതലും ഗോവ, പഞ്ചാബ്, ഗുജറാത്ത്, മഹാരാഷ്ട്ര, കേരളം, തമിഴ്നാട്, ഡൽഹി, ചണ്ഡിഗഡ് എന്നിവിടങ്ങളിൽ നിന്നുള്ളവരാണ്. ഓരോ മാസവും ശരാശരി 11,422 ഇന്ത്യക്കാർ പൗരത്വം ഉപേക്ഷിക്കുന്നുണ്ടെന്നാണ് കണക്കുകൾ സൂചിപ്പിക്കുന്നത്. 2011 മുതൽ 2022 വരെയുള്ള കാലയളവിൽ 70,000 ത്തോളം ഇന്ത്യക്കാർ തങ്ങളുടെ പാസ്സ്പോർട്ടുകൾ തിരികെ ഏൽപിച്ചിട്ടുണ്ട്. ഇതിൽ 28,031 പാസ്സ്പോർട്ടുകൾ ഗോവയിലെ റീജിയണൽ പാസ്പോർട്ട് ഓഫീസിലാണ് ഏൽപിച്ചിട്ടുള്ളത്.
ഗോവയിൽ നിന്നും കൂടുതൽ ആളുകളെ വിദേശത്തേക്ക് കുടിയേറാൻ പ്രേരിപ്പിക്കുന്നത് സവിശേഷമായ ഒരു പൗരത്വ വ്യവസ്ഥയാണ്. 1961 ഡിസംബറിന് മുൻപ് ഗോവയിൽ ജനിച്ചവരുടെ രണ്ട് ഭാവി തലമുറകൾക്ക് വരെ പോർച്ചുഗീസ് പൗരത്വത്തിന് അനുമതിയുണ്ട്. പോർച്ചുഗീസ് പാസ്സ്പോർട്ട് കൈവശമുള്ളയാൾക്ക് യൂറോപ്യൻ യൂണിയൻ ഉൾപ്പടെയുള്ള നിരവധി രാജ്യങ്ങളിലേക്ക് വിസ രഹിത പ്രവേശനം സാധ്യമാണെന്നതാണ് ഗോവയിൽ നിന്നുമുള്ളവരെ ഇന്ത്യൻ പൗരത്വം ഉപേക്ഷിക്കാൻ പ്രേരിപ്പിക്കുന്നത്.
ഇന്ത്യൻ പൗരത്വ നിയമം (1995) അനുസരിച്ച്, ഇന്ത്യൻ പാസ്സ്പോർട്ട് കൈവശമുള്ള ഒരാൾക്ക് മറ്റൊരു രാജ്യത്തെ പൗരത്വം സ്വീകരിക്കാൻ അനുവാദമില്ല. അതുകൊണ്ട് തന്നെ, മറ്റൊരു രാജ്യത്ത് സ്ഥിര താമസത്തിന് അനുമതി ലഭിച്ചാൽ ഇന്ത്യൻ വംശജർ പൗരത്വം ഉപേക്ഷിക്കാൻ നിർബന്ധിതരാകുന്നു. 2011 മുതൽ 2022 വരെയുള്ള കാലയളവിൽ പഞ്ചാബിലും ഛണ്ഡീഗഡിലുമായി 9567 പാസ്സ്പോർട്ടുകൾ തിരിച്ചേൽപിച്ചിട്ടുണ്ട്. ഗുജറാത്തിൽ 8918 ഉം, മഹാരാഷ്ട്രയിലെ വിവിധ റീജിയണൽ പാസ്സ്പോർട്ട് ഓഫീസുകളിലായി 6545 പാസ്സ്പോർട്ടുകളും തിരിച്ചേൽപിച്ചിട്ടുണ്ട്. 3650 പേരാണ് കേരളത്തിലെ വിവിധ പാസ്സ്പോർട്ട് ഓഫീസുകളിലായി പാസ്സ്പോർട്ട് തിരിച്ചേൽപിച്ചിട്ടുള്ളത്.
വിദ്യാഭ്യാസത്തിനത്തിനും തൊഴിൽ അവസരങ്ങൾക്കുമായി വിദേശത്തേക്ക്പോകുന്ന ഇന്ത്യക്കാർ അവിടെ സ്ഥിര താമസമാകുന്ന പതിവ് വർദ്ധിച്ചുവരുകയാണ്. ഇവരെ കൂടാതെ ഇന്ത്യയിലെ അതിസമ്പന്നരും നാടുവിടുകയാണ്. 2022ൽ മാത്രം ഏകദേശം 7500 അതിസമ്പന്നർ ഇന്ത്യ വിട്ട് മറ്റ് രാജ്യങ്ങളിൽ താമസമാക്കിയിട്ടുണ്ടെന്നാണ് കണക്കുകൾ പറയുന്നത്. 2023ൽ 6000 ലധികം സമ്പന്നർ ഇന്ത്യ വിട്ട് പോകാൻ സാധ്യതയുണ്ടെന്നും റിപോർട്ടുകൾ സൂചിപ്പിക്കുന്നു. ഓസ്ട്രേലിയ, അമേരിക്ക, സ്വിറ്റ്സർലൻഡ്, യു എ ഇ എന്നീ രാജ്യങ്ങളാണ് കുടിയേറി പാർക്കാൻ ഇന്ത്യയിലെ സമ്പന്നർ തിരഞ്ഞെടുക്കുന്നത്.
2015 മുതൽ ഇന്ത്യൻ പൗരത്വം ഉപേക്ഷിച്ചവരുടെ കണക്കുകൾ:
2015 : 1,31,489
2016 : 1,41,603
2017 : 1,33,049
2018 : 1,34,561
2019:1,44,017
2020 :85,256
2021: 1,63,370
2022 : 2,25,620