947 – 1014 കാലഘട്ടത്തിൽ ജീവിച്ച രാജരാജ ചോളന്റെ കഥ പറയുന്ന തമിഴ് ചിത്രമാണ് പൊന്നിയൻ സെൽവൻ. സിനിമയുടെ സാങ്കേതിക – വാണിജ്യ മേഖലയെ കുറിച്ചുള്ള ചർച്ചയോടപ്പം തന്നെ സിനിമയുടെ പ്രമേയം മുന്നോട്ട് വെക്കുന്ന ചോള സാമ്രാജ്യത്വത്തിന്റെയും അതിന്റെ ചക്രവർത്തി ആയിരുന്ന രാജരാജ ചോളന്റെയും ചരിത്രത്തെ സംബന്ധിച്ച സംവാദങ്ങളും സിനിമയെ ചുറ്റിപറ്റി നിലനിൽക്കുന്നു. തമിഴിലെ പ്രമുഖ സംവിധായകനായ വെട്രിമാരൻ, ഹിന്ദു അല്ലാതിരുന്ന ചോള രാജാവിനെ ഹിന്ദുവായി സിനിമയിൽ ചിത്രീകരിച്ചു എന്ന വിമർശനം ഉന്നയിച്ചിരുന്നു. തുടർന്ന് കമൽഹാസനും വെട്രിമാരനെ പിന്തുണച്ച് കൊണ്ട് രംഗത്ത് വന്നു.
യഥാർത്ഥത്തിൽ ആരാണ് രാജരാജ ചോളൻ? അദ്ദേഹത്തിന്റെ മതത്തെ കുറിച്ചുള്ള നിലവിലെ ചർച്ചകളുടെ യാഥാർഥ്യമെന്ത്? ഫാക്റ്റ്ഷീറ്റ്സ് പരിശോധിക്കുന്നു.
ചരിത്രകാരന്മാരുടെ അഭിപ്രായത്തിൽ രാജരാജ ചോളൻ ഹിന്ദു ആയിരുന്നില്ല. ചരിത്രകാരനായ റിച്ചാർഡ് എച്ച്. ഡേവിസ് പറയുന്നത് ആ കാലഘട്ടത്തിൽ ഹിന്ദു മതം എന്നൊരു പദം ഉപയോഗിച്ചിരുന്നില്ല എന്നും ശിവൻ, വിഷ്ണു, തുടങ്ങിയവയെ ആരാധിക്കുന്ന വ്യത്യസ്ത കൂട്ടങ്ങളാണ് അന്ന് ഉണ്ടായിരുന്നത് എന്നുമാണ്. ഈ സംഘങ്ങളെ ഒന്നിപ്പിക്കുന്ന ‘ഹിന്ദു’ എന്ന സങ്കൽപ്പമോ ഒരൊറ്റ മതമെന്ന ആശയമോ അന്ന് ഉണ്ടായിരുന്നില്ല.
രാജരാജ ചോളൻ ശൈവ മത വിശ്വസിയാണെന്നും അതേ സമയം ബുദ്ധ ജൈന മതങ്ങളെയും അദ്ദേഹം പിന്തുണച്ചിരുന്നു എന്നും ഡേവിസ് പറയുന്നുണ്ട്.
ഹിന്ദു ക്ഷേത്രമായ തഞ്ചാവൂരിലെ ബൃഹദീശ്വര ക്ഷേത്രം നിർമിച്ചത് രാജരാജ ചോളൻ ആണെന്ന വാദത്തോട് ഡേവിസ് പ്രതികരിച്ചത്, ആ കാലത്ത് അദ്ദേഹം ശിവനെ ആരാധിക്കാൻ വേണ്ടി നിർമിച്ച ശിവ ക്ഷേത്രമാണ് അതെന്നും മറിച്ച് ഇന്നത്തെ അർത്ഥത്തിൽ ‘ഹിന്ദു ക്ഷേത്രം’ എന്ന സങ്കല്പത്തിൽ അല്ല എന്നുമാണ്.
അതിനാൽ തന്നെ രാജരാജ ചോളനെ ഹിന്ദു എന്ന് വിളിക്കുന്നത് ചരിത്രവിരുദ്ധമായ ഒരു സമീപനമാണ് എന്നാണ് റിച്ചാർഡ് ഡേവിസിന്റെ പക്ഷം.
മറ്റ് ചരിത്രകാരന്മാരും ഡേവിസിന്റെ വീക്ഷണത്തോട് യോജിക്കുകയും അത് തെളിയിക്കാൻ സാധ്യമാണ് എന്ന് അവകാശപ്പെടുകയും ചെയ്യുന്നു. “ചരിത്രപരമായി മതവും പാരമ്പര്യവും എങ്ങനെയാണ് നിലനിന്നിരുന്നത് എന്നതിനെ കുറിച്ചാണ് വെട്രിമാരനും കമൽഹാസനും സംസാരിക്കുന്നത് എന്നും ഞാൻ അതിനോട് പൂർണമായും യോജിക്കുന്നുവെന്നും ജവഹർലാൽ നെഹ്റു സർവകലാശാല പുരാതന ചരിത്ര വിഭാഗം പ്രൊഫസർ മഹാലക്ഷ്മി കൃഷ്ണൻ പറഞ്ഞു. മധ്യകാല ചരിത്രത്തെ പറ്റി പറയുമ്പോൾ ‘ഹിന്ദു’ എന്നത് തെറ്റായ പ്രയോഗമാണ്.
ശൈവ മതം ഹിന്ദു മതമായി സങ്കൽപ്പിക്കാൻ തുടങ്ങിയത് പിന്നെയും കുറെ കാലം കഴിഞ്ഞാണ് എന്ന് മദ്രാസ് യൂണിവേഴ്‌സിറ്റിയിൽ നിന്ന് ചരിത്രത്തിൽ ഡോക്ടറേറ്റ് ഉള്ള പ്രൊഫസർ ടി കെ വെങ്കട്ടസുബ്രഹ്മണ്യം പറഞ്ഞു.
“രാജരാജ ചോളൻ ശൈവ മത വിശ്വസിയായിരുന്നു. ഹിന്ദു എന്നായി കൊണ്ടല്ല മറിച്ച് ശൈവ വിശ്വാസത്തിന്റെ ഭാഗമായാണ് ബൃഹദീശ്വര ക്ഷേത്രം അദ്ദേഹം പണിതത്. കാരണം അന്ന് ഹിന്ദു എന്നൊരു വർഗ്ഗീകരണം ഉണ്ടായിരുന്നില്ല. പിന്നീട് കൊളോണിയൽ കാലത്തെ സംഭാവനയാണ് ഹിന്ദു എന്ന വാക്ക് “
(പ്രൊഫസർ ടി കെ വെങ്കട്ടസുബ്രഹ്മണ്യം)
985 CE – 1014 CE കാലഘട്ടത്തിൽ ചോള സാമ്രാജ്യം ഭരിക്കുകയും ശൈവമതം ആചരിക്കുകയും തഞ്ചാവൂരിൽ ‘പെരുവടയാർ കോവിൽ’ പണിയുകയും ചെയ്തയാ രാജരാജ ചോളന്റെ മേൽ ‘ഹിന്ദു’ പോലുള്ള ആധുനിക ഐഡന്റിറ്റികൾ അടിച്ചേൽപ്പിക്കുന്നത്
ശരിയാണോ എന്നതാണ് ചോദ്യം?
