2001ൽ താലിബാനെതിരായ യുദ്ധം ആരംഭിച്ചതിനുശേഷം, 3,500-ലധികം സൈനികർ കൊല്ലപ്പെട്ടു. അതിൽ 2,300 -ലധികവും യു.എസ് സൈനികരാണ്. 450 -ലധികം യു.കെ സൈനികരും കൊല്ലപ്പെട്ടിട്ടുണ്ട്. 20,660 അമേരിക്കൻ സൈനികർക്ക് ആക്രമണങ്ങളിൽ പരിക്കേറ്റു. എന്നാൽ ഈ എണ്ണം, കൊല്ലപ്പെട്ട അഫ്ഗാൻ സുരക്ഷാ സേനയുടെയും സാധാരണക്കാരുടെയും എണ്ണവുമായി തുലനം ചെയ്യുമ്പോൾ വളരെ കുറവാണ്.
രണ്ട് പതിറ്റാണ്ടുകാലം നീണ്ടുനിന്ന, അമേരിക്കയുടെ യുദ്ധമാണ് അഫ്ഗാനിസ്താനിൽ അവസാനിച്ചത്. ഇരുപത് വർഷങ്ങൾക്കിടയിൽ അമേരിക്കയിൽ നാലു പ്രസിഡന്റുമാർ മാറിമാറി വന്നിട്ടും അഫ്ഗാനിസ്താനിൽ കാര്യമായ മാറ്റങ്ങളൊന്നും സംഭവിച്ചില്ല. ഇതിനിടയിൽ പതിനായിരക്കണക്കിന് ആളുകളാണ് അഫ്ഗാനിൽ കൊല്ലപ്പെട്ടത്. അധിനിവേശം ഇരുപത് വർഷങ്ങൾ പിന്നിട്ടതോടെ തങ്ങളുടെ സൈന്യത്തെ അഫ്ഗാനിൽനിന്ന് പിൻവലിക്കാനുള്ള തീരുമാനം അമേരിക്ക നടപ്പാക്കുകയായിരുന്നു. യു.എസ് സൈന്യം അഫ്ഗാനിൽ നിന്ന് രക്ഷപ്പെട്ട് പോകുമ്പോൾ, നഷ്ടപ്പെട്ട ജീവനുകളുടേയും ദുരിതത്തിലായ കുടുംബങ്ങളുടെയും ചിലവായ ഡോളറുകളുടെയും കണക്കുകൾ പരിശോധിക്കേണ്ടതുണ്ട്.
2001 ഒക്ടോബർ മുതൽ 2021 ഏപ്രിൽ വരെയുള്ള കണക്കുകളും യു.എൻ നിരീക്ഷണ സമിതിയുടെ വിലയിരുത്തലും പറയുന്നത്, 72 മധ്യമ പ്രവർത്തകരും അവരെ സഹായിക്കുന്ന 444 സന്നദ്ധ പ്രവർത്തകരും അഫ്ഗാനിൽ കൊല്ലപ്പെട്ടിട്ടുണ്ട്. യു.എസ് പ്രതിരോധ വകുപ്പിന്റെ കണക്കനുസരിച്ച്, 2001 ഒക്ടോബർ മുതൽ 2019 സെപ്റ്റംബർ വരെ അഫ്ഗാനിലെ മൊത്തം സൈനിക ചെലവ് 778 ബില്യൺ ഡോളറാണ്.
യുഎസ് സ്റ്റേറ്റ് ഡിപ്പാർട്ട്മെന്റ് – യു.എസ് ഏജൻസി ഫോർ ഇന്റർനാഷണൽ ഡെവലപ്മെന്റും (യു.എസ്.ഐ.ഐ.ഡി) മറ്റ് സർക്കാർ ഏജൻസികളും കൂടി പുനർനിർമ്മാണ പദ്ധതികൾക്കായി 44 ബില്യൺ ഡോളർ ചെലവഴിച്ചിട്ടുണ്ട്.
2001-2019 കാലയളവിലെ മൊത്തം ചിലവ് 822 ബില്യൺ ഡോളറാണ്. അഫ്ഗാനുമായി ബന്ധപ്പെട്ട ഓപ്പറേഷന്റെ ഭാഗമായി പാകിസ്ഥാനിൽ ചികവഴിക്കുന്ന തുകയുടെ കണക്ക് ഇതിൽപ്പെടുന്നില്ല. ബ്രൗൺ യൂണിവേഴ്സിറ്റിയുടെ പഠനമനുസരിച്ച്, 2019 വരെ അഫ്ഗാനിസ്താനിലേയും പാകിസ്താനിലേയും അമേരിക്കയുടെ യുദ്ധച്ചെലവ് ഏകദേശം 978 ബില്യൺ ഡോളറാണ്.
അമേരിക്ക കഴിഞ്ഞാൽ അഫ്ഗാനിസ്ഥാനിൽ ഏറ്റവും കൂടുതൽ സൈനികരുള്ള യു.കെയും ജർമ്മനിയും യുദ്ധസമയത്ത് യഥാക്രമം 30 ബില്യൺ, 19 ബില്യൺ ഡോളറുകൾ ചെലവഴിച്ചിട്ടുണ്ട്. അഫ്ഗാനിന്റെ സ്വന്തം സൈന്യത്തിന് ധനസഹായം നൽകാൻ അമേരിക്കയും നാറ്റോയും 2024 വരെ പ്രതിവർഷം നാല് ബില്യൺ ഡോളർ വാഗ്ദാനം ചെയ്തിട്ടുണ്ട്. ഈ വർഷം ഇതുവരെ, നാറ്റോ 72 മില്യൺ ഡോളറിന്റെ സാധനങ്ങളും ഉപകരണങ്ങളുമാണ് അഫ്ഗാനിലേക്ക് അയച്ചത്.
2002 മുതൽ അഫ്ഗാനിസ്ഥാനിലെ പുനർനിർമ്മാണ പ്രവർത്തനങ്ങൾക്കായി യു.എസ് ഏകദേശം 143.27 ബില്യൺ ഡോളർ ചെലവഴിച്ചു. ഇതിൽ പകുതിയിലധികവും (88.32 ബില്യൻ ഡോളർ) അഫ്ഗാൻ നാഷണൽ ആർമിയും പോലീസ് സേനയും ഉൾപ്പെടെ അഫ്ഗാൻ സുരക്ഷാ സേനയെ കെട്ടിപ്പടുക്കാനാണ് ചെലവഴിച്ചത്. ഭരണത്തിനും വികസനത്തിനുമായി ഏകദേശം 36 ബില്യൺ ഡോളർ അനുവദിച്ചു. അതേസമയം ലഹരി വിരുദ്ധ പ്രവർത്തനങ്ങൾക്കും മാനുഷിക സഹായത്തിനും ചെറിയ തുകകളാണ് അനുവദിക്കപ്പെട്ടത്.
2001ൽ താലിബാനെതിരായ യുദ്ധം ആരംഭിച്ചതിനുശേഷം, 3,500-ലധികം സൈനികർ കൊല്ലപ്പെട്ടു. അതിൽ 2,300 -ലധികവും യു.എസ് സൈനികരാണ്. 450 -ലധികം യു.കെ സൈനികരും കൊല്ലപ്പെട്ടിട്ടുണ്ട്. 20,660 അമേരിക്കൻ സൈനികർക്ക് ആക്രമണങ്ങളിൽ പരിക്കേറ്റു. എന്നാൽ ഈ എണ്ണം, കൊല്ലപ്പെട്ട അഫ്ഗാൻ സുരക്ഷാ സേനയുടെയും സാധാരണക്കാരുടെയും എണ്ണവുമായി തുലനം ചെയ്യുമ്പോൾ വളരെ കുറവാണ്.
താൻ പ്രസിഡന്റ് ആകുന്നതിന് അഞ്ച് വർഷം മുമ്പ് അഫ്ഗാൻ സുരക്ഷാ സേനയിലെ 45,000 ത്തിലധികം അംഗങ്ങൾ കൊല്ലപ്പെട്ടതായി 2019ൽ മുൻ അഫ്ഗാനിസ്ഥാൻ പ്രസിഡന്റ് അഷറഫ് ഗനി പറയുകയുണ്ടായി. യുദ്ധം ആരംഭിച്ച 2001 ഒക്ടോബർ മുതൽ അഫ്ഗാൻ സൈന്യത്തിലേയും പൊലീസിലെയും 64,100 -ലധികം പേർക്ക് ജീവഹാനി സംഭവിച്ചതായി ബ്രൗൺ സർവകലാശാല 2019-ൽ നടത്തിയ പഠനം സൂചിപ്പിക്കുന്നു.
യുനൈറ്റഡ് നേഷൻസ് അസിസ്റ്റന്റ്സ് മിഷൻ ഇൻ അഫ്ഗാനിസ്ഥാന്റെ (UNAMA) അഭിപ്രായത്തിൽ, 2009ൽ പൗരന്മാർക്ക് ഉണ്ടാകുന്ന അപകടങ്ങൾ വ്യവസ്ഥാപിതമായി രേഖപ്പെടുത്താൻ തുടങ്ങിയതിനുശേഷം ഏകദേശം 111,000 സാധാരണക്കാർ കൊല്ലപ്പെടുകയോ പരിക്കേൽക്കുകയോ ചെയ്തിട്ടുണ്ട്. ഇത്രയും മനുഷ്യരെ കൊല ചെയ്യുകയും ഡോളറുകൾ ചെലവഴിക്കുകയും ചെയ്തിട്ട് സാമ്രാജ്യത്വ ശക്തികൾ നേടിയത് എന്താണ്?