1
ഏപ്രിൽ 16, ഹനുമാൻ ജയന്തി പ്രമാണിച്ച് ജഹാംഗീർപുരിയിൽ ശോഭാ യാത്ര സംഘടിപ്പിച്ചിരുന്നു. യാത്രയ്ക്ക് നേരെ കല്ലേറുണ്ടായെന്ന ആരോപണത്തെ തുടർന്ന് വർഗീയ കലാപം അരങ്ങേറി. ഇന്ത്യയിലെ വ്യത്യസ്ത സംസ്ഥാനങ്ങളിൽ സമാനമായ ആക്രമണങ്ങൾ ഉണ്ടായതിന്റെ തൊട്ടുപിന്നാലെ നടന്ന കുടിയൊഴിപ്പിക്കൽ നടപടി ഇവിടെയും ആവർത്തിച്ചു.
2
ഹനുമാൻ ജയന്തി ദിനത്തിൽ ഡൽഹിയിലെ ജഹാംഗീർ പൂരി മേഖലയിൽ നടത്താനിരുന്ന ശോഭാ യാത്രയ്ക്ക് നേരെ കല്ലെറിഞ്ഞ സാമൂഹിക വിരുദ്ധരുടെയും കലാപകാരികളുടെയും അനധികൃത കയ്യേറ്റങ്ങൾ ബുൾഡോസർ ഉപയോഗിച്ച് ഒഴിപ്പിക്കണമെന്ന് ആവശ്യപ്പെട്ട് ദില്ലി ഭാരതീയ ജനതാ പാർട്ടി മേധാവി ആദേശ് ഗുപ്ത നോർത്ത് ഡൽഹി മുനിസിപ്പൽ കോർപ്പറേഷൻ സിവിക് സെന്റർ – മേയറിന് ഏപ്രിൽ 19 ന് കത്തെഴുത്തുന്നു.
3
തൊട്ടടുത്ത ദിവസം ഏപ്രിൽ 20 ന് നോർത്ത് ദില്ലി മുനിസിപ്പൽ കോർപ്പറേഷൻ (എൻഡിഎംസി) ജഹാംഗീർപുരിയിലെ നിവാസികളെ പൂട്ടിയിട്ട് ഭൂരിഭാഗം മുസ്ലീങ്ങളുടേതായ വീടുകളും കടകളും വ്യാപാര സ്ഥാപനങ്ങളും തകർത്തു കൊണ്ട് പൊളിച്ചുമാറ്റൽ നടപടി ആരംഭിച്ചു.
4
നടപടി ആരംഭിച്ചതിന് തൊട്ടുപിന്നാലെ പൊളിച്ചുനീക്കൽ നിർത്താൻ സുപ്രീം കോടതി ഉത്തരവിട്ടു. എന്നാൽ സ്റ്റേ ഉത്തരവുണ്ടായിട്ടും എൻഡിഎംസി മേയറുടെയും ഡൽഹി പൊലീസിന്റെയും സാന്നിധ്യത്തിൽ ഒരു മണിക്കൂറോളം പൊളിക്കൽ തുടർന്നു.
5
ശനിയാഴ്ച നടന്ന കലാപത്തിൽ പ്രതികളാക്കിയ മുസ്‌ലിംങ്ങളുടെ കെട്ടിടങ്ങൾ തകർത്തുവെന്ന് അവകാശപ്പെട്ട് ജമിയത്ത് ഉലമ ഇ ഹിന്ദ് സമർപ്പിച്ച ഹർജിയിൽ ജസ്റ്റിസുമാരായ എൽ നാഗേശ്വര റാവു, ബി ആർ ഗവായ് എന്നിവരടങ്ങിയ ബെഞ്ച് കേന്ദ്രത്തിനും മറ്റുള്ളവർക്കും നോട്ടീസ് അയച്ചിരുന്നു. മുതിർന്ന അഭിഭാഷകരായ ദുഷ്യന്ത് ദവെ, കപിൽ സിബൽ, സഞ്ജയ് ഹെഗ്ഡെ തുടങ്ങിയവർ വാദിച്ചു നേടിയ നോട്ടീസ് സിപിഐഎം നേതാവ് ബൃന്ദ കാരാട്ട് നേരിട്ട് ചെന്ന് കാണിച്ചതിനെ തുടർന്ന് മാത്രമാണ് ബുൾഡോസർ ആക്രമണം നിർത്തി വെച്ചത്.
6
രാജ്യത്തെ പരമോന്നത നീതിപീഠത്തോടുള്ള നഗ്നമായ ധിക്കാരം മാറ്റിനിർത്തിയാൽ പോലും NDM നടത്തിയ പൊളിക്കൽ സ്ഥാപിത നിയമങ്ങളും തത്വങ്ങളും ഒപ്പം ബാധിച്ചവരുടെ മൗലികാവകാശങ്ങളും ലംഘിക്കുന്നതായിരുന്നു.
7
ഒന്നാമതായി, ഡൽഹി മുനിസിപ്പൽ കോർപ്പറേഷൻ നിയമം, 1957 അല്ലെങ്കിൽ ഡൽഹി വികസന നിയമം, 1957 – ബാധിത കക്ഷികൾക്ക് മുൻകൂർ അറിയിപ്പ് നൽകാതെ കെട്ടിടങ്ങളും ഘടനകളും പൊളിക്കാൻ സർക്കാർ ഏജൻസിയെ അനുവദിക്കുന്നില്ല. ഈ നിയമങ്ങൾ ലംഘിച്ചു കൊണ്ടാണ് ഭരണകൂടം ആളുകളെ കുടിയൊഴിപ്പിക്കുകയും കെട്ടിടങ്ങൾ നശിപ്പിക്കുകയും ചെയ്തത്.
ഡൽഹി മുനിസിപ്പൽ കോർപ്പറേഷൻ നിയമം, 1957
ഉടമയ്ക്കോ ബന്ധപ്പെട്ട വ്യക്തിക്കോ എന്തുകൊണ്ട് ഈ ഉത്തരവ് നടപ്പിലാക്കരുത് എന്ന് കാണിക്കാൻ ന്യായമായ അവസരം നൽകിയിട്ടില്ലെങ്കിൽ അത്തരത്തിലുള്ള ഒരു ഉത്തരവ് പുറപ്പെടുവിക്കാൻ അവകാശമില്ല.
ഡൽഹി വികസന നിയമം, 1957
എന്തുകൊണ്ട് അത്തരം ഉത്തരവ് പുറപ്പെടുവിക്കരുത് എന്ന് കാണിക്കുന്നതിനുള്ള ന്യായമായ അവസരം ഒരു നോട്ടിസ് മുഖേന ആ വ്യക്തിക്ക് നൽകിയെന്ന് കമ്മീഷണർക്ക് ഉചിതമാം വിധം തോന്നിയില്ലെങ്കിൽ പൊളിക്കുന്നതിനുള്ള ഒരു ഉത്തരവും ഉണ്ടാക്കാൻ പാടുള്ളതല്ല.
8
ദുരിതബാധിതരുടെ ന്യായമായ വാദം കേൾക്കാൻ അവസരമില്ലാത്തതിനാൽ, നിയമത്തിന് മുന്നിൽ തുല്യത ഉറപ്പാക്കുന്ന ഭരണഘടനയുടെ ആർട്ടിക്കിൾ 14 പ്രകാരമുള്ള അവകാശങ്ങൾ ലംഘിക്കപ്പെടുന്നു. വീടുകളുടെയും ബിസിനസ്സുകളുടെയും കുടിയൊഴിപ്പിക്കലും പൊളിക്കലും നടപ്പിലാക്കുന്നതിലൂടെ ആർട്ടിക്കിൾ 21 പ്രകാരം അന്തസ്സോടെ ജീവിക്കാനുള്ള ഒരാളുടെ അവകാശത്തെ ഹനിക്കുന്നതിലേക്ക് നയിക്കുന്നു.
9
2010 ഫെബ്രുവരിയിൽ ഭരണകൂടം ആളുകളെ ഒഴിപ്പിക്കുന്നതിന് മുമ്പ് പുനരധിവാസത്തിന് അർഹരായ ആളുകളെ കണ്ടെത്തുന്നതിനും ഓരോ വ്യക്തിയുടെയും അർത്ഥവത്തായ പുനരധിവാസം നടത്തുന്നതിനും ഒരു സർവേ നടത്തണമെന്ന് ഡൽഹി ഹൈക്കോടതി ഉത്തരവിട്ടിരുന്നു. ഇത് പിന്നീട് 2017-ൽ സുപ്രീം കോടതി ശരിവെക്കുകയും ചെയ്തു. 2019-ൽ അജയ് മാക്കൻ (and others v. യൂണിയൻ ഓഫ് ഇന്ത്യ (and others) വിധിയിൽ ഡൽഹി ഹൈക്കോടതി ആവർത്തിക്കുകയും ചെയ്തിരുന്നു.
10
വികസനത്തെ അടിസ്ഥാനമാക്കിയുള്ള കുടിയൊഴിപ്പിക്കലുകളും സ്ഥാനചലനവും സംബന്ധിച്ച അടിസ്ഥാന തത്വങ്ങളും മാർഗ്ഗനിർദ്ദേശങ്ങളുമുള്ള യുഎൻ പ്രത്യേക റിപ്പോർട്ടിൽ കുടിയൊഴിപ്പിക്കൽ ഒഴിവാക്കാനാവില്ലെന്ന് അധികാരികൾ തെളിയിക്കേണ്ടതിന്റെ ആവശ്യകത ഉൾപ്പെടുന്നു. കുടിയൊഴിപ്പിക്കൽ വ്യക്തികളെ ഭവനരഹിതരാക്കുകയോ മറ്റ് മനുഷ്യാവകാശങ്ങളുടെ ലംഘനത്തിന് ഇരയാക്കുകയോ ചെയ്യരുതെന്നും അതിൽ പ്രസ്താവിക്കുന്നുണ്ട്.
11
2019ലെ പാർപ്പിട, നഗരകാര്യ മന്ത്രാലയത്തിന്റെ വിജ്ഞാപനത്തിൽ ഡൽഹിയിൽ 1,797 അനധികൃത കോളനികൾ രേഖപ്പെടുത്തിയിട്ടുണ്ട്. ഡൽഹി 2008-09 ലെ സാമ്പത്തിക സർവേ പ്രകാരം മൊത്തം നഗര ജനസംഖ്യയുടെ 23.7% മാത്രമാണ് ആസൂത്രിത കോളനികളിൽ താമസിക്കുന്നതെന്നും, ബാക്കിയുള്ളവർ ചേരികളിലും ഗ്രാമങ്ങളിലും ആസൂത്രണം ചെയ്യാത്തതും അല്ലെങ്കിൽ അനധികൃത സെറ്റിൽമെന്റുകളിലും താമസിക്കുകയാണെന്നിരിക്കെ ഭൂരിപക്ഷവും മുസ്ലിങ്ങളുടെ താമസിക്കുന്ന തൊഴിൽ ചെയ്യുന്ന കെട്ടിടങ്ങളുള്ള ഇടം, ആക്രമണം നടന്നതിന് തൊട്ടടുത്ത ദിവസങ്ങളിലായി തകർക്കപ്പെടുന്നതിന്റെ രാഷ്ട്രീയം എന്താണ്?
12
2020-ൽ, ഡൽഹി നിയമസഭാ തെരഞ്ഞെടുപ്പിന് തൊട്ടുമുമ്പ്, അനധികൃത കോളനികളിലെ താമസക്കാർക്ക് സ്വത്തവകാശം നൽകുന്ന പദ്ധതിയായ PM-UDAY കേന്ദ്ര സർക്കാർ പ്രഖ്യാപിച്ചിരുന്നു. സമ്പന്നരല്ലാത്ത അനധികൃത കോളനികളിലെ നിവാസികൾക്ക് മാത്രമേ ഈ സ്കീമിന് കീഴിൽ റെഗുലറൈസേഷന് അപേക്ഷിക്കാൻ കഴിയൂ. ഈ അനധികൃത കോളനികളിൽ ഡൽഹി ഡെവലപ്മെന്റ് അതോറിറ്റിക്ക് നിരവധി ഭവന പദ്ധതികൾ ഉണ്ടെന്നത് ശ്രദ്ധേയമാണ്.
ജഹാംഗീർപുരി പൊളിക്കൽ നടപടിയുടെ ഇരകളിൽ ഒരാൾ തന്റെ കട 1977-78 കാലഘട്ടത്തിൽ ഡിഡിഎ അനുവദിച്ചതാണെന്ന് അവകാശപ്പെട്ട് സുപ്രീം കോടതിയെ സമീപിച്ചിരിക്കുകയാണ്.
