ലോകാരോഗ്യ സംഘടനയും യു.എന്നും സംയുക്തമായി പ്രസിദ്ധീകരിച്ച, ‘പ്രൊട്ടക്ട് ദി പ്രോമിസ്’ 2022 റിപ്പോർട്ട് പ്രകാരം, കാലാവസ്ഥാ വ്യതിയാനം, സംഘർഷങ്ങൾ, കോവിഡ് 19 തുടങ്ങിയവയുടെ പ്രത്യാഘാതങ്ങൾ മൂലം ആഗോളതലത്തിൽ സ്ത്രീകളുടെയും കുട്ടികളുടെയും ആരോഗ്യസ്ഥിതി തകർന്നിരിക്കുകയാണ്.
2021-ൽ, ലോകത്താകെ ഏകദേശം 25 ദശലക്ഷം കുട്ടികൾക്ക് മതിയായ വാക്സിനേഷൻ ലഭ്യമായിട്ടില്ല. ഇതിനാൽ, ഇവർക്ക് മാരകമായ രോഗങ്ങൾ പിടിപെടാനുള്ള സാധ്യത വർദ്ധിച്ചിരിക്കുന്നു. കോവിഡ് 19 മൂലം ദശലക്ഷക്കണക്കിന് കുട്ടികൾക്ക് സ്കൂൾ വിദ്യാഭ്യാസം നഷ്ടപ്പെട്ടു. 104 രാജ്യങ്ങളിലെ, ഏകദേശം 80% കുട്ടികൾക്ക്, സ്കൂൾ അടച്ചുപൂട്ടൽ കാരണം പഠന ശേഷി നഷ്ടപ്പെടുന്ന അവസ്ഥയുണ്ടായി. കോവിഡ് മഹാമാരിയുടെ തുടക്കം മുതൽ, ലോകത്താകെ 10.5 ദശലക്ഷം കുട്ടികൾക്ക്, മാതാപിതാക്കളെയോ പരിപാലകരെയോ നഷ്ടപ്പെട്ടു.
ജന്മസ്ഥലം, സംഘർഷഭരിതമായ സാഹചര്യം, കുടുംബത്തിലെ സാമ്പത്തിക സാഹചര്യങ്ങൾ
എന്നിവയെ അടിസ്ഥാനമാക്കിയാണ് ആരോഗ്യകരമായ ജീവിതം നയിക്കാനുള്ള കുട്ടികളുടെയും കൗമാരപ്രായക്കാരുടെയും, സ്ത്രീകളുടെയും സാധ്യതകൾ നിലനിൽക്കുന്നതെന്ന് റിപ്പോർട്ട് പറയുന്നു. റിപ്പോർട്ടിലെ പ്രസക്ത ഭാഗങ്ങൾ:
- കുറഞ്ഞ വരുമാനമുള്ള രാജ്യത്ത് ജനിക്കുന്ന ഒരു കുട്ടിയുടെ ശരാശരി ആയുർദൈർഘ്യം ഏകദേശം 63 വർഷമാണ്. അതേസമയം ഉയർന്ന വരുമാനമുള്ള രാജ്യത്ത് ഇത് 80 ആണ്. 2021-ൽ യൂറോപ്പിലോ, വടക്കേ അമേരിക്കയിലോ ജനിക്കുന്ന കുട്ടിയുടെ ശരാശരി ആയുർദൈർഘ്യം 77.2 വർഷമാണെങ്കിൽ, സബ്-സഹാറൻ ആഫ്രിക്കയിൽ ഇത് 59.7 വർഷമാണ്.
- 2020-ൽ, 5 ദശലക്ഷം കുട്ടികളാണ് ലോകത്താകെ 5 വയസ്സിനുമുമ്പ് മരണപെട്ടത്. ഭൂരിഭാഗം മാതൃ, ശിശു, മരണങ്ങളും സംഭവിച്ചിട്ടുള്ളത് സബ്-സഹാറൻ ആഫ്രിക്കയിലും ദക്ഷിണേഷ്യയിലുമാണ്. ശിശുമരണങ്ങളിൽ കൂടുതലും- ന്യുമോണിയ, ഡയേറിയ, മലേറിയ തുടങ്ങിയ, തടയാവുന്നതും ചെലവ് കുറഞ്ഞ ഇടപെടലുകൾ കൊണ്ട് ചികിത്സിക്കാവുന്നതുമായ രോഗങ്ങൾ മൂലം സംഭവിച്ചവയാണ്. സബ്-സഹാറൻ ആഫ്രിക്കയിൽ 37 സ്ത്രീകളിൽ ഒരാൾ പ്രസവ കാലത്ത് മരണപെടാൻ സാധ്യതയുണ്ടെങ്കിൽ, യൂറോപ്പിലെയും വടക്കേ അമേരിക്കയിലെയും 4800 സ്ത്രീകളിൽ ഒരാൾ മാത്രമാണ് പ്രസവ കാലത്ത് മരണപ്പെടാൻ സാധ്യതയുള്ളത്.
- 2020-ൽ, ലോകത്താകെ 45 ദശലക്ഷത്തിലധികം കുട്ടികൾക്ക് പോഷകാഹാരക്കുറവ് ഉണ്ടായിരുന്നു. പോഷകാഹാരക്കുറവ് കുട്ടികളുടെ മരണത്തിനും, വളർച്ചാ കാലതാമസത്തിനും, രോഗത്തിനും ഇരയാക്കുന്ന അവസ്ഥയാണ്. ഈ കുട്ടികളിൽ മുക്കാൽ ഭാഗവും താഴ്ന്ന, ഇടത്തരം വരുമാനമുള്ള രാജ്യങ്ങളിലാണ് താമസിക്കുന്നത്. പോഷകാഹാരക്കുറവ് മൂലം വളർച്ച മുരടിപ്പ്, ക്ഷയം അല്ലെങ്കിൽ അമിതഭാരം എന്നീ അവസ്ഥകൾ ബാധിച്ച കുട്ടികളിൽ ഭൂരിഭാഗവും ആഫ്രിക്ക, ഏഷ്യ എന്നിവിടങ്ങളിൽ നിന്നുള്ളവരാണ്.
- 2020-ൽ, ലോകത്താകെ149 ദശലക്ഷം കുട്ടികൾക്ക് വളർച്ച മുരടിപ്പ് റിപ്പോർട്ട് ചെയ്തിട്ടുണ്ട്. ഏറ്റവും പുതിയ കണക്കുകൾ പ്രകാരം, മുരടിപ്പ് വ്യാപനത്തിന്റെ തോത് താഴ്ന്ന വരുമാനമുള്ള രാജ്യങ്ങളിൽ 34.6% ആവുമ്പോൾ ഉയർന്ന വരുമാനമുള്ള രാജ്യങ്ങളിൽ ഇത് 3 .4 % ആണ്. ആഫ്രിക്കയിൽ കഴിഞ്ഞ 20 വർഷത്തിനിടെ വളർച്ച മുരടിച്ച കുട്ടികളുടെ എണ്ണം, 54.4 ദശലക്ഷത്തിൽ നിന്ന് 61.4 ദശലക്ഷമായി വർദ്ധിച്ചിരിക്കുകയാണ്.
- രാജ്യത്തിന്റെ സാമ്പത്തിക സ്ഥിതി അനുസരിച്ച് കുട്ടികളുടെ സ്കൂൾ വിദ്യാഭാസ പൂർത്തീകരണ നിരക്കിലും വലിയ വ്യത്യാസമുണ്ട്. 2021 ൽ സബ്-സഹാറൻ ആഫ്രിക്കയിൽ പ്രൈമറി, അപ്പർ സെക്കൻഡറി വിദ്യാഭാസം പൂർത്തിയാക്കിയ കുട്ടികളുടെ എണ്ണം 64%, 27.1% എന്നിങ്ങനെയാണെങ്കിൽ യൂറോപ്പിലും വടക്കേ അമേരിക്കയിലും ഇത് 99.8%, 89.6% എന്നിങ്ങനെയാണ്.
- ആഭ്യന്തരമായി കുടിയൊഴിപ്പിക്കപെട്ട ആളുകൾ ഏറ്റവും കൂടുതലുള്ള അഫ്ഗാനിസ്ഥാൻ, ഡെമോക്രാറ്റിക് റിപ്പബ്ലിക് ഓഫ് കോംഗോ, എത്യോപ്യ, സുഡാൻ, സിറിയൻ അറബ് റിപ്പബ്ലിക്, യെമൻ എന്നീ ആറ് രാജ്യങ്ങൾ ഭക്ഷ്യ അരക്ഷിത രാജ്യങ്ങളുടെ പട്ടികയിൽ ആദ്യ പത്തിൽ ഇടം പിടിക്കുന്നുണ്ട്.
- അഫ്ഗാനിസ്ഥാൻ, എത്യോപ്യ, പാകിസ്ഥാൻ, സൊമാലിയ, ഉക്രെയ്ൻ, യെമൻ എന്നിവിടങ്ങളിലെ സംഘർഷഭരിതമായ സാഹചര്യം മൂലം ദശലക്ഷക്കണക്കിന് സ്ത്രീകളും കുട്ടികളും ശാരീരികവും മാനസികവുമായ അസ്വാസ്ഥ്യങ്ങൾ അനുഭവിക്കുന്നുണ്ട്. 2021-ൽ, 89.3 ദശലക്ഷം ആളുകളാണ് യുദ്ധം, പീഡനം, വിവിധ രീതിയിലുള്ള മനുഷ്യാവകാശ ലംഘനങ്ങൾ, എന്നിവ മൂലം തങ്ങളുടെ വീടുകളിൽ നിന്ന് പുറത്താക്കപ്പെട്ടത്.
- സംഘർഷം മൂലമുള്ള ആന്തരിക കുടിയിറക്കലുകൾ, കാലാവസ്ഥാ വ്യതിയാനം മൂലമുള്ള പ്രകൃതി ദുരന്തങ്ങൾ തുടങ്ങിയ കാരണങ്ങളാൽ അതിർത്തി കടക്കാൻ നിർബന്ധിതരായ സ്ത്രീകളും കുട്ടികളും നിരവധി ആരോഗ്യപ്രശ്നങ്ങൾ അഭിമുകീകരിക്കേണ്ടി വരുന്നു.
- സ്ത്രീകളേയും കുട്ടികളേയും പ്രതികൂലമായി ബാധിക്കുന്ന അസമത്വങ്ങൾ രാജ്യങ്ങൾക്കുള്ളിലും നിലനിൽക്കുന്നുണ്ട്. ഒരു രാജ്യത്തെ ന്യൂനപക്ഷ സമൂഹങ്ങളും,വിദൂരവും ഗ്രാമീണവുമായ ക്രമീകരണങ്ങളിലോ, നഗര ചേരികളിലോ താമസിക്കുന്നവരുമാണ് ഏറ്റവും കൂടുതൽ വിവേചനം അനുഭവിക്കുന്നത്.
സ്ത്രീകളുടെയും കുട്ടികളുടെയും പുരോഗതി ഉന്നം വെച്ചുള്ള പ്രവർത്തനങ്ങൾ ത്വരിതപെടുത്തുന്നതിന് റിപ്പോർട്ട് മുന്നോട്ട് വെക്കുന്ന ശുപാർശകൾ:
- പ്രാഥമിക ആരോഗ്യ പരിരക്ഷാ സംവിധാനങ്ങൾ ശക്തിപ്പെടുത്തുക.
- വിവിധ മേഖലകൾ തമ്മിലെ സഹകരണം മെച്ചപ്പെടുത്തുകയും, അതുവഴി സേവനങ്ങൾ മികച്ച രീതിയിൽ സംയോജിപ്പിക്കുകയും എല്ലാ സ്ത്രീകലേക്കും, കുട്ടികളിലേക്കും, കൗമാരക്കാരിലേക്കും എത്തുന്ന രീതിയിൽ ക്രമീകരിക്കുകയും ചെയ്യുക.
- സ്ത്രീകളുടെ ശാക്തീകരണം മെച്ചപ്പെടുത്തുകയും സ്ത്രീകളുടെയും കൗമാരക്കാരായ പെൺകുട്ടികളുടെയും നേതൃത്വ അവസരങ്ങൾ വർദ്ധിപ്പിക്കുകയും ചെയ്യുക.
- സ്ത്രീകൾ, കുട്ടികൾ, കൗമാരക്കാർ എന്നിവർക്കുള്ള ധനസഹായവും സേവനങ്ങളും മെച്ചപ്പെടുത്തുന്നതിന് സ്വകാര്യ-പൊതു പങ്കാളിത്തം മെച്ചപ്പെടുത്തുകയും, പ്രയോജനപ്പെടുത്തുകയും ചെയ്യുക.
- സ്ത്രീകളുടെയും കുട്ടികളുടെയും കൗമാരക്കാരുടെയും ആരോഗ്യപരിചരണത്തിനായുള്ള സാമ്പത്തിക നിക്ഷേപങ്ങൾ വർദ്ധിപ്പിക്കുക.
- കൂടുതൽ പ്രതിരോധശേഷിയുള്ള ഭക്ഷണ സംവിധാനങ്ങൾ നിർമ്മിക്കുന്നതിനൊപ്പം ഭക്ഷ്യവിതരണം സുരക്ഷിതമാക്കുകയും മാനുഷിക സഹായത്തിന് (humanitarian assistance) മുൻഗണന നൽകുകയും ചെയ്യുക.