അർഷി ഖുറേഷി
യു.പിയിലെ അലഹബാദിൽ ആക്ടിവിസ്റ്റ് ജാവേദ് മുഹമ്മദിന്റെ വീട് ഞായറാഴ്ച്ച അധികൃതർ തകർക്കുകയുണ്ടായി. അനധികൃതമായി നിർമിച്ചതാണെന്ന് പറഞ്ഞാണ് വീട് പൊളിച്ചു മാറ്റിയത്.
മുഹമ്മദ് നബിയെ അപകീർത്തിപ്പെടുത്തുന്ന വിധം ബി.ജെ.പി വക്താവായിരുന്ന നൂപുർ ശർമ നടത്തിയ പരാമർശങ്ങൾക്കെതിരെ അലഹബാദിൽ നടന്ന പ്രതിഷേധങ്ങളുടെ പ്രധാന ഗൂഢാലോചനക്കാരനെന്ന് ആരോപിച്ചുകൊണ്ട് വെൽഫെയർ പാർട്ടി ഓഫ് ഇന്ത്യയുടെ നേതാവ് കൂടിയായ ജാവേദിനെ യു.പി പോലീസ് അറസ്റ്റ് ചെയ്തതിന് തൊട്ടുപിന്നാലെയാണ് ഈ നടപടി.
പ്രതിഷേധവുമായി ബന്ധപ്പെട്ട് 68 പേരെ അലഹബാദിൽ നിന്ന് അറസ്റ്റ് ചെയ്തതായി വെള്ളിയാഴ്ച്ച ഉത്തർപ്രദേശ് പോലീസ് അറിയിച്ചു. അതേ രാത്രി തന്നെ, ജാവേദിന്റെ ഭാര്യയെയും ഇളയ മകളെയും പോലീസ് നിയമവിരുദ്ധമായി കസ്റ്റഡിയിലെടുത്ത് ചോദ്യം ചെയ്യുന്നതിനായി സിവിൽ ലൈൻസ് മഹിളാ പോലീസ് സ്റ്റേഷനിലേക്ക് കൊണ്ടുപോയി. മണിക്കൂറുകൾക്ക് ശേഷമാണ് വിദ്യാർത്ഥി നേതാവും ആക്ടിവിസ്റ്റുമായ ജാവേദിന്റെ മകൾ ആഫ്രീൻ ഇതറിയുന്നത്.
ഞായറാഴ്ച്ച രാവിലെ പ്രയാഗ്‌രാജ് ഡെവലപ്‌മെന്റ് അതോറിറ്റി അഫ്രീന്റെ കുടുംബത്തോട് 11:00 മണിക്ക് വീട് ഒഴിയാൻ ആവശ്യപ്പെട്ടു. “മെയ് 10ന് ജാവേദിന്റെ കുടുംബത്തിന് നോട്ടീസ് നൽകിയിട്ടുണ്ടായിരുന്നുവെന്നും
മെയ് 24 ന് ഹിയറിങ് നടത്തുമെന്ന് അറിയിച്ചിരുന്നതായും അധികൃതർ അവകാശപ്പെട്ടു. എന്നാൽ, കുടുംബത്തിൽ നിന്ന് പ്രതികരണമൊന്നും ലഭിച്ചിട്ടില്ല. വീട് അനധികൃത നിർമാണമാണെന്ന് ചൂണ്ടിക്കാണിച്ചായിരുന്നു നോട്ടീസ്.
തന്റെ കുടുംബാംഗങ്ങൾക്ക് മുമ്പ് ഒരു അറിയിപ്പും നൽകിയിട്ടില്ലെന്നും ഇത് കുപ്രസിദ്ധമായ “ബുൾഡോസർ രാഷ്ട്രീയ”ത്തിന്റെ ഭാഗമാണെന്നും അഫ്രീൻ മക്തൂബ് മീഡിയയോട് പറഞ്ഞു.
ഇടിച്ചുപോളിക്കലും മാധ്യമ ആഘോഷവും
മണിക്കൂറുകൾക്കകം ജാവേദിന്റെയും അഫ്രീൻറെയും വീട് തകരുന്നത് മാധ്യമങ്ങൾ ആഘോഷിച്ചു; തകർന്നു കൊണ്ടിരിക്കുന്ന അവരുടെ വീടിനു മുന്നിൽ നിന്ന് മാധ്യമപ്രവർത്തകർ ബുൾഡോസർ ചെയ്യുന്നതിന്റെ വിശദമായ വിവരണങ്ങൾ നൽകികൊണ്ടിരുന്നു. അവരുടെ കുടുംബത്തിന്റെ സ്വത്തുക്കൾ- ഫർണിച്ചറുകൾ, ഗവേഷണ പ്രബന്ധങ്ങൾ, പോസ്റ്ററുകൾ, പ്രമാണങ്ങൾ, പുസ്‌തകങ്ങൾ എല്ലാം നശിപ്പിക്കുന്നത് തത്സമയം കാണിക്കുകയും അതുവഴി കാഴ്ച്ചക്കാർക്കും അധികാരത്തിലുള്ളവർക്കും കുടുംബത്തിന്റെ വേദന ആസ്വദിക്കാൻ വഴിയൊരുക്കി കൊടുക്കുകയുമാണ് മാധ്യമങ്ങൾ ചെയ്തത്.
തകർന്നു കിടക്കുന്ന വീടിനുള്ളിൽ ഉണ്ടായിരുന്ന, “അനീതി നിയമമാകുമ്പോൾ, കലാപം കടമയായി മാറുന്നു,” എന്ന പോസ്റ്റർ ചൂണ്ടിക്കാണിച്ചുകൊണ്ട് “ഇൻക്രിമിനേറ്റിങ് എവിഡെൻസ്” എന്നാണ് മാധ്യമങ്ങൾ പറഞ്ഞത്. അതിനെ “അക്രമ”വുമായി ബന്ധപ്പെടുത്തികൊണ്ട് റിപ്പോർട്ടർമാർ വാതോരാതെ സംസാരിച്ചുകൊണ്ടിരുന്നു.
അതേസമയം, സർക്കാരിന്റെ നിയമവിരുദ്ധമായ നടപടിയെ ന്യായീകരിച്ച ഭരണകക്ഷി വക്താക്കളെ അവരുടെ സമ്പന്നമായ സ്റ്റുഡിയോകളിലിരുന്ന് വാർത്താ അവതാരകർ അഭിമുഖം നടത്തി.
‘ബുൾഡോസറുകളും കലാപകാരികളും’, ‘കലാപകാരികളെ വെറുതെ വിടില്ല,’ കലാപകാരികൾക്കെതിരെ നടപടി: നീതിയോ പ്രതികാരമോ?, ‘ബുൾഡോസർ നീതിയുടെ കാലം’,’മറക്കാനാവാത്ത നടപടി’, ‘മുഖ്യമന്ത്രിയുടെ നോ ടോളറൻസ് പോളിസി’ എന്നിങ്ങനെയായിരുന്നു പ്രധാന തലക്കെട്ടുകൾ.
അൽ ജസീറക്ക് നൽകിയ അഭിമുഖത്തിൽ അഫ്രീൻ തന്റെ വീടു തകർത്തതിനെ “കുടുംബത്തിനെതിരായ പ്രതികാര നടപടി” എന്നാണ് വിശേഷിപ്പിച്ചത്.
“സമാധാനം തകർക്കാൻ ശ്രമിക്കുന്ന സാമൂഹിക വിരുദ്ധർക്കെതിരെ കർശന നടപടി സ്വീകരിക്കുമെന്ന്” ഉത്തർപ്രദേശ് മുഖ്യമന്ത്രി ശനിയാഴ്ച ട്വീറ്റ് ചെയ്തിരുന്നു, “ഒരു നിരപരാധിയെയും ടാർഗെറ്റുചെയ്യില്ല, ഒരു കുറ്റവാളിയെയും വെറുതെ വിടില്ല” അദ്ദേഹം പറഞ്ഞു.
മാധ്യമങ്ങളും ഭക്തരായ അനുഭാവികളും യോഗിക്ക് “ബുൾഡോസർ ബാബ” എന്ന പേര് നൽകിയിരുന്നു. സർക്കാരിനെതിരെ പ്രക്ഷോഭം നടത്തുന്ന വ്യക്തികളുടെ വീടുകൾ പൊളിച്ചുകളയുന്ന ആദിത്യനാഥിന്റെ നയത്തെ “കൂട്ടായ ശിക്ഷ” എന്നാണ് വിശേഷിപ്പിച്ചത്.
മധ്യപ്രദേശ് ഭരിക്കുന്ന ബി.ജെ.പി സർക്കാർ ഏപ്രിലിൽ രാമനവമി ആഘോഷത്തിനിടെയുണ്ടായ അക്രമങ്ങളുമായി ബന്ധപ്പെട്ട് മുസ്ലീങ്ങളുടെ ഉടമസ്ഥതയിലുള്ള സ്വത്തുക്കൾ നശിപ്പിച്ചിരുന്നു. തൊഴിലാളിവർഗ മുസ്ലിംകളെ ബുദ്ധിമുട്ടിക്കുന്നതിനും സർക്കാരിനെ എതിർക്കുന്നവരെ അടിച്ചമർത്തുവാനുമാണ് സംസ്ഥാന സർക്കാർ ഈ നിയമവിരുദ്ധ നയം നടപ്പിലാക്കുന്നത്.
ഭരിക്കുന്ന സർക്കാരിന്റെ പക്ഷപാതപരമായണ് നടപടിയുടെ ഫലമായി അഫ്രീന്റെ കുടുംബം കഷ്ടപ്പെടുമ്പോൾ, മാധ്യമങ്ങളും ഹിന്ദുത്വ അനുകൂലികളും അവരുടെ ദുരവസ്ഥയിൽ സന്തോഷിച്ചു. അവരുടെ വീട് നശിപ്പിച്ചത് അവർ വിജയമായി ആഘോഷിച്ചു.
“ജാവേദ് മുഹമ്മദിന്റെ വീടിന് നേരെയുള്ള ബുൾഡോസർ ആക്രമണം, യോഗി സർക്കാർ കലാപകാരികളെ വെറുതെ വിടില്ല” സി.എൻ.എൻ ന്യൂസ് ഹിന്ദി റിപ്പോർട്ട് ചെയ്തു.
ഒരു തെളിവിന്റെയും പിൻബലമില്ലാതെയാണ് ഒരാളെ “മാസ്റ്റർ മൈൻഡ്” എന്ന് ഈ വാർത്താ ചാനലുകൾ മുദ്രകുത്തുന്നത്.
മുസ്‌ലിം വീടുകൾ തകർക്കുന്നതിനെ പ്രസിദ്ധമായ വാർത്താ സംഘടനകളും പൊതുജനങ്ങളും ആഘോഷിക്കുന്നത് അർത്ഥശൂന്യമായ വിദ്വേഷത്തിന്റെ ഉദാഹരണമാണ്. അടിസ്ഥാനരഹിതമായ അവകാശവാദങ്ങൾ പ്രചരിപ്പിച്ചുകൊണ്ട് ഇസ്ലാമോഫോബിയ വ്യാപിപ്പിക്കുകയാണ് ഇവർ ചെയ്യുന്നത്.
മുസ്ലീം വീടുകൾ തകർത്തത് മുസ്ലിംകളോടുള്ള പക്ഷപാതത്തിന്റെ രൂപരേഖയാണ് സൂചിപ്പിക്കുന്നത്. മുതിർന്ന മാധ്യമപ്രവർത്തകൻ ഷംസ്-ഉർ-റഹ്മാൻ-അലവി പറയുന്നു. ഇത്തരം സന്ദർഭങ്ങളിൽ മാധ്യമങ്ങൾക്ക് സംശയാസ്പദമായ പങ്കുണ്ട്.
“ഇത്തരം വാർത്തകൾക്ക് നൽകുന്ന പ്രധാന്യം ന്യൂസ് റൂം ഘടനയെയും മുൻവിധികളെയും പ്രതിഫലിപ്പിക്കുന്നു. സ്വന്തം നേട്ടത്തിനായി സ്ഥാപനത്തെ ത്രിപ്തിപെടുതുകയാണ് റിപ്പോർമാർ ലക്ഷ്യമിടുന്നത്” അലവി കൂട്ടിച്ചേർത്തു.
“ജനങ്ങളുടെ അഭിപ്രായം രൂപപ്പെടുത്തുന്നതിൽ മാധ്യമങ്ങൾ പ്രധാന പങ്ക് വഹിക്കുന്നുണ്ട്. ഇന്ത്യ പോലുള്ള ഒരു വലിയ രാജ്യത്ത്, പക്ഷപാതപരമായ കവറേജുകൾ പരിശോധിക്കാൻ നമുക്ക് ഒരു മാധ്യമ നിരീക്ഷകസംഘം ഇല്ലെന്നത് നിർഭാഗ്യകരമാണ്” അലവി പറഞ്ഞു.
പൊളിറ്റിക്കൽ അനലിസ്റ്റ് സൈനബ് സിക്കന്ദർ തന്റെ ‘ഇസ്ലാമോഫോബിയ ഇൻ ഇന്ത്യൻ മീഡിയ’ എന്ന പ്രബന്ധത്തിൽ എഴുതുന്നു; “മുസ്ലീങ്ങളെ ഭീകരവാദികൾ എന്ന് മുദ്രകുത്തിയുള്ള മാധ്യമങ്ങളുടെ നിരന്തര ആക്രമണത്തിലൂടെ ഇസ്ലാമോഫോബിയയുടെ കേന്ദ്രമാവുകയാണ് ഇന്ത്യ.”
ഇന്ത്യൻ മുസ്ലിംകളെ പൈശാചികവൽക്കരിക്കുന്നത് വർഗീയ പ്രൈംടൈം ഷോകളാണെന്ന് അവർ പറയുന്നു. “ക്ലിക്ക്ബെയ്റ്റ്’ ആയ മുൻ പേജിലെ തലക്കെട്ടുകൾ, കമ്മ്യൂണിറ്റികൾക്കിടയിലെ വിള്ളലുകൾ ആഴത്തിലാക്കാനും “ഞങ്ങൾക്കെതിരെ അവർ” എന്ന ആശയം ഊട്ടി ഉറപ്പിക്കുന്നതുമാണ്” സിക്കന്ദർ എഴുതുന്നു.
ഇന്ത്യൻ മാധ്യമങ്ങൾ ഇന്ത്യയിലെ ഭൂരിപക്ഷ ജനവിഭാഗങ്ങളുടെ ഹൃദയങ്ങളിൽ മുസ്ലിംകളെ കുറിച്ച് യുക്തിരഹിതമായ ഭയം സൃഷ്ടിച്ചുകൊണ്ട്, രാജ്യത്തെ മനുഷ്യാവകാശങ്ങൾ നിഷേധിക്കുകയാണ്.
ജാവേദ് മുഹമ്മദിന്റെ അഭിഭാഷകൻ കമൽ കൃഷ്ണ റോയ് വീട് പൊളിക്കാനുള്ള നടപടി ചോദ്യം ചെയ്തുകൊണ്ട് അലഹബാദ് കോടതിയെ സമീപിച്ചിരുന്നു.
ജാവേദ് മുഹമ്മദിന്റെ ഭാര്യ പർവീൺ ഫാത്തിമയുടെ പേരിലാണ് വീട് രജിസ്റ്റർ ചെയ്തിരിക്കുന്നതെന്ന് റോയ് ചീഫ് ജസ്റ്റിസിന് അയച്ച കത്തിൽ പറയുന്നു. “പർവീൺ ഫാത്തിമയുടെ പിതാവിൽ നിന്നുള്ള സമ്മാനമാണ് വീട്” എന്ന് റോയ് ‘സ്ക്രോളി’നോട് പറഞ്ഞു.
ആ വീട് പൊളിക്കാൻ ജില്ലാ-പോലീസ് ഭരണകൂടവും വികസന അതോറിറ്റിയും നടത്തുന്ന ഏതൊരു ശ്രമവും നിയമത്തിന്റെ അടിസ്ഥാന തത്വങ്ങൾക്ക് വിരുദ്ധവും ജാവേദ് മുഹമ്മദിന്റെ ഭാര്യയോടും മക്കളോടും കാണിക്കുന്ന കടുത്ത അനീതിയുമാണെന്ന് ചീഫ് ജസ്റ്റിസിന് അയച്ച കത്തിൽ റോയ് പറയുന്നു.
ഇരുപത് വർഷത്തിലേറെയായി തങ്ങൾ വീട്ടു നികുതി അടയ്ക്കുന്നുണ്ടെന്നും അലഹബാദ് വികസന അധികാരികളിൽ നിന്ന് ഒരു അറിയിപ്പും ലഭിച്ചിട്ടില്ലെന്നും അഫ്രീൻ മാധ്യമങ്ങളോട് പറഞ്ഞു.
“അത് നിയമവിരുദ്ധമായ വീടാണെങ്കിൽ എന്തിനാണ് അവർ ഞങ്ങളുടെ നികുതി സ്വീകരിക്കുന്നത്?” ഫാത്തിമ ചോദിച്ചു.
അലഹബാദ് ഹൈക്കോടതിയിൽ അഭിഭാഷകനായ അരീബ് ഉദ്ദീൻ അഹമ്മദ് പറയുന്നു, ഇത്തരം പൊളിക്കൽ നടപടികളുടെ മുഴുവൻ പ്രക്രിയയും നിയമവാഴ്ചയുടെ ലംഘനമാണെന്നു.
“ഗണ്യമായ സമയം നൽകാതെയുള്ള ഇത്തരം പൊളിക്കൽ നടപടി, ‘അവരെ കേൾക്കുക’ എന്ന അടിസ്ഥാന അവകാശത്തിന്റെ ലംഘനമാണ്(റൈറ്റ് ടു ബി ഹേർഡ് ) – ആരും കേൾക്കാതെ അപലപിക്കരുത് എന്നതാണ് സ്വാഭാവിക നീതിയുടെ പ്രധാന തത്വങ്ങളിലൊന്ന്. പൊളിക്കൽ നടപടിയുടെ കാര്യത്തിൽ ഇത് വ്യക്തമായി പാലിക്കപ്പെട്ടില്ല.” അഹമ്മദ് പറഞ്ഞു.
2010ലെ സുദാമ സിങ് കേസിൽ കുടിയൊഴിപ്പിക്കപ്പെടുന്നതിന് മുമ്പ്, കുടിയൊഴിപ്പിക്കൽ നേരിടുന്ന എല്ലാവരെയും സർവേ ചെയ്യുകയും പുനരധിവാസ പദ്ധതി ആസൂത്രണം ചെയ്യുകയും ചെയ്യേണ്ടത് സംസ്ഥാനത്തിന്റെ കടമയാണെന്നാണ് ഡൽഹി ഹൈക്കോടതി വ്യക്തമാക്കിയതെന്ന് അദ്ദേഹം വിശദീകരിച്ചു.
സംസ്ഥാനത്തിന് കാരണങ്ങളുണ്ടെങ്കിൽ, കെട്ടിടം പൊളിക്കാൻ ആഗ്രഹിക്കുന്നുവെങ്കിൽ,
ഉദ്യോഗസ്ഥർ ആദ്യം പകരം സ്ഥലം കണ്ടെത്തേണ്ടതുണ്ടെന്നും അലഹബാദ് ഹൈക്കോടതി പറഞ്ഞു.
ജവഹർലാൽ നെഹ്‌റു യൂണിവേഴ്‌സിറ്റി സ്റ്റുഡന്റ്‌സ് യൂണിയന്റെ തിരഞ്ഞെടുക്കപ്പെട്ട വിദ്യാർത്ഥി നേതാവും സി.എ.എ വിരുദ്ധ പ്രക്ഷോഭം നയിച്ച നേതാക്കളിലൊരാളുമാണ് അഫ്രീൻ. നിലവിൽ ഫ്രറ്റേണിറ്റി മൂവ്‌മെന്റിന്റെ ദേശീയ സെക്രട്ടറിയാണ്.
സമാജ്‌വാദി പാർട്ടി, കോൺഗ്രസ്, ബി.എസ്.പി, എ.ഐ.എം.ഐ.എം, ഐ.യു.എം.എൽ, ഡബ്ല്യു.പി.ഐ, എസ്.ഡി.പി.ഐ, പി.എഫ്‌.ഐ നിരവധി വിദ്യാർഥി സംഘടനകൾ, ജവഹർലാൽ നെഹ്‌റു സർവകലാശാല സ്റ്റുഡന്റ്‌സ് യൂണിയൻ എന്നിവയുടെ നേതാക്കൾ ഉത്തർപ്രദേശ് പോലീസിന്റെ പക്ഷപാതപരമായ നടപടികളെ അപലപിച്ച് ജാവേദിനെ ഉടൻ വിട്ടയക്കണമെന്ന് ആവശ്യപ്പെട്ടു.
