പാക്കിസ്ഥാൻ ഏജന്റിന് രാജ്യത്തിൻ്റെ പ്രതിരോധ രഹസ്യങ്ങൾ ചോർത്തി നൽകിയതിന് മഹാരാഷ്ട്ര പോലീസിന്റെ തീവ്രവാദ പ്രതിരോധ സേന (എ.ടി.എസ്) അറസ്റ്റ് ചെയ്ത പ്രദീപ് എം കുരുൾക്കർ എന്ന ഡി.ആർ.ഡി.ഓ ഉദ്യോഗസ്ഥൻ, ആർ.എസ്.എസ് സജീവ പ്രവർത്തകനാണെന്ന വാർത്ത പുറത്തു വന്നത് മെയ് പത്തിനായിരുന്നു. താൻ വിശ്വസിക്കുന്നത് ആർ.എസ്.എസ് ആശയങ്ങളാണെന്നും, തന്റെ മുത്തശ്ശന്റെ കാലം തൊട്ടേ തങ്ങൾ ആർ.എസ്.എസ് പ്രവർത്തകരാണെന്നും കുരുൾക്കർ ഒരു യൂട്യൂബ് ചാനലിന് നൽകിയ അഭിമുഖത്തിൽ വിശദീകരിക്കുന്നുണ്ട്.
ആർ.എസ്.എസ് ആശയങ്ങൾ എങ്ങനെ രാജ്യദ്രോഹപരമായി പ്രവർത്തിക്കുന്നു എന്നതിൻ്റെ തെളിവാണ് ഇവിടെ വെളിപ്പെടുന്നത് എന്നാണ് കോൺഗ്രസ് വക്താവ് പവൻ ഖേര ഇതിനോട് പ്രതികരിച്ചത്. എന്നാൽ, രാജ്യദ്രോഹപരമല്ലാത്ത പ്രവർത്തനം ആർ.എസ്.എസിനുണ്ടോ?
ഇത് ആദ്യമായല്ല രാജ്യദ്രോഹ കുറ്റങ്ങളിൽ അർ.എസ്.എസ് പ്രവർത്തകർ പ്രതിസ്ഥാനത്ത് വരുന്നത്. ഇതിന് മുൻപും രാജ്യത്തിന്റെ സുരക്ഷയെയും രാജ്യത്തെ ജനങ്ങളുടെ ജീവിതത്തെയും അപകടത്തിലാക്കിയ പല സംഭവങ്ങൾക്ക് പിന്നിലും ആർ.എസ്.എസോ അവരുടെ ആശയങ്ങളോ ആയിരുന്നുവെന്ന വെളിപ്പെടുത്തലുകൾ ഉണ്ടായിട്ടുണ്ട്. ഗാന്ധിജിയുടെ കൊലപാതകം തുടങ്ങി ഇന്ത്യയിലെ വിവിധ പ്രദേശങ്ങളിലായി നടന്ന ബോംബ് സ്ഫോടനങ്ങൾ ഉൾപ്പടെ ഹിന്ദുത്വ രാഷ്ട്രീയത്തിന്റെ വക്താക്കൾ പ്രതികളായ സംഭവങ്ങൾ നിരവധിയാണ്.
ഗോഡ്‌സെ മുതൽ പരശുറാം വാഗ്മോറെ വരെ
1948 ജനുവരി 30 നാണ് ന്യൂ ഡൽഹിയിലെ ബിർള ഹൗസിൽ വെച്ച് മഹാത്മാ ഗാന്ധി വെടിയേറ്റ് മരിക്കുന്നത്. ആർ.എസ്.എസ് നേതാവ് വി.ഡി സവർക്കർ ഉൾപ്പടെ ഗാന്ധിയെ വധിക്കാനുള്ള ഗൂഢാലോചനയുടെ ഭാഗമായിരുന്നു. പല രീതിയിലുള്ള സ്വാധീനങ്ങൾ ഉപയോഗിച്ച് ചരിത്രം വക്രീകരിക്കാൻ ശ്രമിക്കുമ്പോഴും, ആർ.എസ്.എസ് വ്യക്തമായി ആസൂത്രണം ചെയ്ത് നടത്തിയ കൊലപാതകമാണ് ഗാന്ധിജിയുടേതെന്ന വസ്തുത നിലനിൽക്കുന്നു. ആർ.എസ്.എസ് പടർത്തിയ വിദ്വേഷമാണ് ഗോഡ്‌സെയെ ഗാന്ധിയുടെ കൊലപാതകിയാക്കിയതെന്ന് വ്യക്തമാണ്. മുസ്ലീങ്ങളെ പ്രീണിപ്പിക്കുന്നതിലും അതുവഴി പാകിസ്ഥാന്റെ രൂപീകരണത്തെ സഹായിക്കുന്നതിലും മഹാത്മ ഗാന്ധി ഉത്തരവാദിയായിരുന്നുവെന്ന് ഗോഡ്‌സെ ഉറച്ച് വിശ്വസിച്ചു. ഹിന്ദുക്കളുടെ ഉന്നമനത്തിനായി പ്രവർത്തിക്കുന്നയാളാണ് താൻ എന്നാണ് ‘വൈ ഐ അസാസിനേറ്റഡ് മഹാത്മാ ഗാന്ധി’ എന്ന പുസ്തകത്തിൽ ഗോഡ്‌സെ പറയുന്നത്. ഗാന്ധിയുടെ ആശയങ്ങൾ രാജ്യത്തെ ഹിന്ദുക്കൾക്ക് ഭീഷണിയാണെന്നും അതിനാലാണ് അദ്ദേഹം കൊല്ലപ്പെട്ടതെന്നും വരുത്തിത്തീർക്കുകയായിരുന്നു ആർ.എസ്.എസ് ചെയ്തത്.
2017 സെപ്റ്റംബർ 5 ന് തന്റെ ബാംഗ്ലൂരിലെ വസതിയിൽ വെച്ച്, മാധ്യമപ്രവർത്തകയായ ഗൗരി ലങ്കേഷ് വെടിയേറ്റ് മരിച്ചു. സനാതൻ സൻസ്ത ഉൾപ്പടെയുള്ള ഹിന്ദുത്വ സംഘടനകളിൽ അംഗങ്ങളായ പതിനേഴ് പേരെ പോലീസ് അറസ്റ്റ് ചെയ്തു. ദക്ഷിണേന്ത്യൻ സംസ്ഥാനങ്ങളിൽ ഉടനീളം പ്രവർത്തിക്കുന്ന ഒരു “സംഘടിത ക്രൈം സിൻഡിക്കേറ്റിന്റെ” ഭാഗമാണ് കൊലയാളി സംഘമെന്ന് അന്നേഷണത്തിൽ വ്യക്തമായി. കൂടാതെ 2000 ത്തിന്റെ തുടക്കത്തിൽ ഗോവയിൽ നടന്ന നിരവധി ബോംബാക്രമണങ്ങൾ ആസൂത്രണം ചെയ്ത് നടപ്പിലാക്കിയതും ഈ സംഘമാണെന്ന് പോലീസ് കണ്ടെത്തി. ഗൗരി ലങ്കേഷിനു പുറമെ, ഗോവിന്ദ് പൻസാരെ, നരേന്ദ്ര ദഭോൽക്കർ, എം.എം കൽബുർഗി എന്നിവരുടെ കൊലപാതകത്തിലും ഇതേ സംഘമാണ് പ്രതികൾ.
പോലീസിന്റെ പക്കലുള്ള വിവരങ്ങൾ അനുസരിച്ച്, കൊലപാതകങ്ങളുടെ സൂത്രധാരൻ എന്ന് കരുതപ്പെടുന്ന അമോൽ കാലെ, മതപരമായ സമ്മേളനങ്ങളിൽ വെച്ച് വലതുപക്ഷ പ്രവർത്തകരെ തിരഞ്ഞെടുക്കുകയും അവർക്ക് പരിശീലനം നൽകി കൊലയാളികളാക്കുകയാണ് ചെയ്യുന്നത്. ഗൗരി ലങ്കേഷിനെ കൊലപ്പെടുത്തിയ പരശുറാം വാഗ്മോറെ ഇത്തരത്തിൽ പരിശീലനം നൽകപ്പെട്ടയാളാണ്. ഗൗരിയുടെ ലേഖനങ്ങൾ വായിക്കാനും അവരുടെ പ്രസംഗങ്ങളുടെ വീഡിയോ കാണാനും അമോൽ കലെ വാഗ്മോറെയെ പ്രേരിപ്പിച്ചു. 2012 ൽ ഹിന്ദുമതത്തിന്റെ വേരുകളെ ചോദ്യം ചെയ്തുകൊണ്ടുള്ള ഗൗരി ലങ്കേഷിന്റെ പ്രസംഗം പരശുറാം വാഗ്മറെയുൾപ്പടെയുള്ള പ്രതികൾ പല തവണ കണ്ടിട്ടുണ്ട്. ഹിന്ദു മതത്തിനെതിരെ പ്രചാരണം നടത്തിയതിനാണ് ഗൗരി ലങ്കേഷിനെ കൊലപ്പെടുത്തിയതെന്നായിരുന്നു വാഗ്മോറെ പോലീസിനോട് പറഞ്ഞത്.
ആർ.എസ്.എസ് ആസൂത്രണം ചെയ്ത സ്ഫോടനങ്ങൾ
2002 സെപ്റ്റംബർ 24 നാണ് ഗുജറാത്തിലെ അക്ഷർദാം ക്ഷേത്രം ആക്രമിക്കപ്പെടുന്നത്. അക്രമികളെ പോലീസ് വെടിവെപ്പിൽ കൊലപ്പെടുത്തി. 33 പേരുടെ മരണത്തിന് ഇടയാക്കിയ ഈ അക്രമത്തിന് പിന്നിൽ ‘മുസ്ലിം തീവ്രവാദികളാണെന്നും’ അതിന് പ്രതികാരമായി മുസ്ലിംകൾ കൊല്ലപ്പെടണമെന്നുമുള്ള ലക്ഷ്യത്തോടെയാണ് ആർ.എസ്.എസ് പ്രവർത്തകരായ പ്രഗ്യ സിംഗ് താക്കൂർ, അസീമാനന്ത് തുടങ്ങിയ നേതാക്കൾ ചേർന്ന് മഹാരാഷ്ട്രയിലെ മുസ്ലിം ഭൂരിപക്ഷ പ്രദേശമായ മാലേഗാവിൽ ബോംബ് ആക്രമണം ആസൂത്രണം ചെയ്യുന്നതെന്ന് ‘ദി കാരവൻ’ പുറത്തു വിട്ട അന്വേഷണ റിപ്പോർട്ടിൽ പറയുന്നു.
2008ൽ മാലേഗാവിൽ സ്കൂട്ടറിൽ ഘടിപ്പിച്ച ബോംബ് പൊട്ടിത്തെറിച്ചു നാല് പേർ മരിക്കുകയും 79 പേർക്ക് പരിക്കേൽക്കുകയും ചെയ്തു. 2008 ഒക്ടോബറിൽ പ്രഗ്യ സിംഗ് അറസ്റ്റ് ചെയ്യപ്പെട്ടു. സ്ഫോടനത്തിനുപയോഗിച്ച സ്കൂട്ടർ പ്രഗ്യയുടേതാണെന്നും, അവരാണ് കൂട്ടുപ്രതിയായ രാമചന്ദ്ര കൽസൻഗ്രേക്ക് അത് നൽകിയതെന്നും മഹാരഷ്ട്ര എ.ടി.എസ് കണ്ടെത്തി. പ്രഗ്യ സിങ്ങിനെതിരെ എ.ടി.എസ് ഹാജരാക്കിയ തെളിവുകളിൽ, സ്ഫോടനത്തിന്റെ ആസൂത്രണവുമായി ബന്ധപ്പെട്ട പല യോഗങ്ങളിലും അവർ പങ്കെടുത്തതായി സമർത്ഥിക്കുന്ന, സാക്ഷികളിൽ നിന്നും കൂട്ടുപ്രതികളിൽ നിന്നുമുള്ള മൊഴികളും ഉൾപ്പെട്ടിരുന്നു. എന്നാൽ, 2016ൽ മതിയായ തെളിവുകളില്ലെന്ന് പറഞ്ഞ് എൻ.ഐ.എ, പ്രഗ്യ ഉൾപ്പടെ അഞ്ചു പേരെ പ്രതി പട്ടികയിൽ നിന്നും ഒഴിവാക്കുകയായിരുന്നു.
2017 ഏപ്രിലിൽ ആരോഗ്യ സ്ഥിതി പരിഗണിച്ചുകൊണ്ട് ബോംബെ ഹൈ കോടതി പ്രഗ്യക്ക് ജാമ്യം നൽകി. ഇന്ന് ഭോപ്പാലിൽ നിന്നുമുള്ള ബി.ജെ.പി ലോക്സഭാംഗമാണ് പ്രഗ്യ.
2007 ഫെബ്രുവരി 18 ന് നടന്ന സംഝോത എക്‌സ്‌പ്രസ് സ്ഫോടനത്തിന് പിന്നിലും ആർ.എസ്.എസ് ആയിരുന്നു. 70 പേരാണ് സ്‌ഫോടനത്തിൽ കൊല്ലപ്പെട്ടത്. സുനിൽ ജോഷി, സ്വാമി അസീമാനന്ദ, പ്രഗ്യ സിംഗ്, സന്ദീപ് ഡാങ്കെ, രാമചന്ദ്ര കൽസംഗ്ര, ലോകേഷ് ശർമ്മ എന്നിങ്ങനെ ആർ.എസ്.എസിന്റെ പ്രധാനപ്പെട്ട നേതാക്കളായിരുന്നു സ്ഫോടനം ആസൂത്രണം ചെയ്തത്. 2006 വാരണാസി സ്ഫോടനങ്ങൾക്ക് മറുപടിയായിട്ടാണ് സംഝോത എക്‌സ്‌പ്രസ് സ്ഫോടനം നടന്നതെന്ന് സ്വാമി അസീമാനന്ദ് പോലീസിനോട് പറയുന്നുണ്ട്. 28 പേരുടെ മരണത്തിനിടയാക്കിയ വാരാണസി ബോംബ് സ്‌ഫോടനങ്ങളിൽ പ്രതികളെന്ന് പോലീസ് രേഖപ്പെടുത്തിയ അഞ്ചു പേരിൽ ഇതുവരെ പിടികൂടാനായത് ഒരാളെയാണ്.
മലേഗാവ് സ്‌ഫോടനങ്ങളിലേക്ക് നയിച്ച കാരണമായി ആർ.എസ്.എസ് പറയുന്ന അക്ഷർദാം ക്ഷേത്രത്തിലെ അക്രമവുമായി ബന്ധപെട്ടു അറസ്റ്റ് ചെയ്ത ആറു മുസ്ലിംകളെ 2014 ൽ തെളിവില്ലെന്ന് ചൂണ്ടികാണിച്ചു സുപ്രീം കോടതി വെറുതെ വിട്ടു. അപ്പോൾ ഈ ആക്രമണങ്ങൾക്ക് പിന്നിൽ ആരായിരുന്നുവെന്ന ചോദ്യവും അവശേഷിക്കുന്നുണ്ട്.
2022 സെപ്റ്റംബറിൽ, ആർ.എസ്.എസുമായി ബന്ധപ്പെട്ട സംഘടനകൾ, 2004ലെ ലോക്‌സഭാ തെരഞ്ഞെടുപ്പിന് ഒരു വർഷം മുമ്പ് സംഘടിപ്പിച്ച ബോംബ് നിർമാണ ക്യാമ്പിൽ താൻ പങ്കെടുത്തിട്ടുണ്ടെന്ന് മഹാരാഷ്ട്രയിലെ നാന്ദേഡ് കോടതിയിൽ സമർപ്പിച്ച സത്യവാങ്മൂലത്തിൽ മുൻ ആർ.എസ്.എസ് പ്രവർത്തകനായ യശ്വന്ത് ഷിൻഡെ പറയുന്നുണ്ട്. രാജ്യത്തുടനീളം നടന്ന പല ബോംബ് സ്ഫോടനങ്ങൾക്ക് പിന്നിലും ആർ.എസ്.എസ്സാണെന്ന് അയാൾ പറയുന്നു. സ്ഫോടനങ്ങൾ ആസൂത്രണം ചെയ്യുന്നതിലും, നടപ്പാക്കുന്നതിലും പല തലങ്ങളിൽ ഏർപ്പെട്ടിരുന്ന നിരവധി ആർ.എസ്.എസ്, വിശ്വഹിന്ദു പരിഷത്ത് പ്രവർത്തകരുടെ പേരുകൾ 2006 നാന്ദേഡ് സ്‌ഫോടനവുമായി ബന്ധപെട്ട് ഷിൻഡെ സമർപ്പിച്ച സത്യവാങ്മൂലത്തിൽ പരാമർശിക്കുന്നുണ്ട്.
2006 ഏപ്രിലിൽ, നന്ദേഡിലെ ഒരു എക്സിക്യൂട്ടീവ് എഞ്ചിനീയറുടെ വീട്ടിൽ അബദ്ധത്തിൽ ബോംബ് പൊട്ടിത്തെറിക്കുകയും ഹിമാൻഷു പാൻസെ, നരേഷ് രാജ്കോണ്ട്വാർ എന്നിവർ കൊല്ലപ്പെടുകയും ചെയ്തു. നന്ദേഡ് സ്‌ഫോടനവുമായി ബന്ധപ്പെട്ട കേസിൽ പ്രതികളാണ് കൊല്ലപ്പെട്ട ഇവർ രണ്ട് പേരും. കൊല്ലപ്പെട്ട പാൻസെ തന്റെ സുഹൃത്താണെന്ന് ഷിൻഡെ അവകാശപ്പെട്ടു. മഹാരാഷ്ട്ര എ.ടി.എസിന്റെ നേതൃത്വത്തിൽ നടന്ന അന്വേഷണത്തിൽ, 2003-നും 2004-നും ഇടയിൽ പർഭാനി, പൂർണ, ജൽന എന്നിവിടങ്ങളിലെ മുസ്ലിം പള്ളികളിൽ നടന്ന ബോംബ് സ്ഫോടനങ്ങൾക്ക് പിന്നിൽ പാൻസെയും സുഹൃത്തുക്കളുമാണെന്ന് കണ്ടെത്തി. 2007 ഫെബ്രുവരിയിൽ കേസ് സി.ബി.ഐ ഏറ്റെടുക്കുകയായിരുന്നു.
2016 ഓഗസ്റ്റിൽ പർഭാനി പള്ളിയിലുണ്ടായ സ്‌ഫോടനവുമായി ബന്ധപ്പെട്ട കേസിൽ നാല് പ്രതികളെയും പർഭാനി ജില്ലാ കോടതി വെറുതെവിട്ടു. 2012ൽ പൂർണ, ജൽന പള്ളികളിലെ സ്‌ഫോടനവുമായി ബന്ധപ്പെട്ട് അറസ്റ്റിലായ ഏഴ് പ്രതികളെ ജൽന ജില്ലാ കോടതി വെറുതെവിട്ടു. ഈ രണ്ട് കേസിലും പ്രതികളായവർ തന്നെയാണ് നന്ദേഡ് സ്ഫോടന കേസിൽ വിചാരണ നേരിടുന്നത്. ഈ കേസിൽ വിചാരണ തെളിവെടുപ്പ് ഘട്ടത്തിലാണ്. ഈ ഘട്ടത്തിലാണ് ഗൂഢാലോചനയെക്കുറിച്ച് തനിക്ക് അറിയാമെന്നും അതിനാൽ സാക്ഷിയായി പരിഗണിക്കണമെന്നും ആവിശ്യപ്പെട്ട് ഷിൻഡെ കോടതിയിൽ ഹാജരായത്. രാജ്യവ്യാപകമായി സ്ഫോടനങ്ങൾ നടത്താനുള്ള ഗൂഢാലോചനയുടെ സൂത്രധാരൻ വി.എച്.പി നേതാവ് മിലിന്ദ് പരാണ്ഡെ ആയിരുന്നുവെന്നും, മോഹൻ ഭാഗവത് തുടങ്ങിയ നേതാക്കൾ ഇത്തരത്തിലുള്ള തീവ്രവാദ പ്രവർത്തനങ്ങളെ പിന്തുണച്ചിരുന്നതായും ഷിൻഡെ ആരോപിച്ചു.
1990 മുതൽ ആർ.എസ്.എസിന്റെ സജീവ പ്രവർത്തകനായിരുന്നു യശ്വന്ത് ഷിൻഡെ. ഷിൻഡെ സമർപ്പിച്ച സത്യവാങ്മൂലത്തിലെ പ്രസക്ത ഭാഗങ്ങൾ:
“താൻ പങ്കെടുത്ത ക്യാമ്പിൽ മഹാരാഷ്ട്രയിലെ ഔറംഗബാദ്, ജൽഗാവ്, നന്ദേഡ് തുടങ്ങിയ ജില്ലകളിൽ നിന്നുള്ള 20 ഓളം യുവാക്കൾ പരിശീലനത്തിന് എത്തിയിരുന്നു. ക്യാമ്പിൽ പങ്കെടുത്ത ഹിമാൻഷു പാൻസെ മഹാരാഷ്ട്രയിലെ മറാത്ത്വാഡ മേഖലയിൽ മൂന്ന് സ്ഫോടനങ്ങൾ നടത്തിയിരുന്നു. ഔറംഗാബാദിലെ പ്രധാനപെട്ട ഒരു മസ്ജിദിൽ വൻ സ്ഫോടനം നടത്താൻ പദ്ധതിയിട്ടിരുന്ന ഇയാൾ, ആ സ്ഫോടനത്തിനായി ബോംബ് ഉണ്ടാക്കുന്നതിനിടെയാണ് 2006ൽ നന്ദേഡിൽ വെച്ച് മരണപ്പെടുന്നത്.
രാജ്യത്തുടനീളം സ്ഫോടനങ്ങൾ നടത്താനുള്ള ആർ.എസ്.എസിന്റെ പദ്ധതി പ്രതീക്ഷിച്ചത്ര വിജയിക്കാത്തതിനാൽ ബി.ജെ.പിക്ക് രാഷ്ട്രീയ നേട്ടമുണ്ടായില്ല. തത്ഫലമായി 2004-ലെ തിരഞ്ഞെടുപ്പിൽ കോൺഗ്രസ് ഭൂരിപക്ഷം നേടി. പ്രധാന ഗൂഢാലോചനക്കാരായ മിലിന്ദ് പരാണ്ഡെയെപ്പോലുള്ളവർ ഭയന്ന് ഒളിവിൽ പോയെങ്കിലും അവർ രഹസ്യമായി ഗൂഢാലോചനകൾ തുടർന്നു. മറവിലിരുന്ന് അവർ രാജ്യത്തുടനീളം നിരവധി ബോംബ് സ്ഫോടനങ്ങൾ നടത്തി; പോലീസിന്റെയും, മാധ്യമങ്ങളുടെയും സഹായത്തോടെ ഈ സ്‌ഫോടനങ്ങളിൽ മുസ്ലിംകളെ കുറ്റക്കാരാക്കി. ഇത് 2014ലെ ലോക്‌സഭാ തിരഞ്ഞെടുപ്പിൽ ബി.ജെ.പിയെ സഹായിച്ചു.”
ഒരു വിഭാഗത്തിനെതിരെ വിദ്വേഷവും വെറുപ്പും പ്രചരിപ്പിച്ച്, രാഷ്ട്രീയ ലാഭമുണ്ടാക്കുക എന്നതാണ് ആർ.എസ്.എസിന്റെ പ്രവർത്തന രീതി. അവിടെ രാജ്യത്തിനോ, രാജ്യ സുരക്ഷക്കോ, ആർ.എസ്.എസ് പ്രതിനിധികരിക്കുന്നുവെന്ന് അവകാശപ്പെടുന്ന ഭൂരിപക്ഷ സമൂഹത്തിന്റെ ജീവന് പോലും വിലയില്ല. അതുകൊണ്ട് തന്നെ ആർ.എസ്.എസ്സിന് ഒരു മുഖമേ ഉള്ളു, അത് രാജ്യ ദ്രോഹത്തിന്റെയാണ്.
